वीरगन्ज,४भदौं :वीरगन्ज महानगरपालिकाले महानगर मातहत रहेका सामुदायिक विद्यालयका शिक्षकले आँफु कार्यरत रहेको विद्यालय बाहेक अन्य विद्यालयमा काम गरेको पाइएमा कारबाही गर्ने चेतावनी दिएको छ ।
महानगरका सामुदायिक विद्यालयमा कार्यरत शिक्षकहरु विद्यालयमा नियमित रुपमा उपस्थित नहुने गरेको र बाहिरका अन्य विद्यालयमा काम गरेको पाइएको र यसले विद्यालयको पठनपाठनमा असर परेको वीरगन्ज महानगरपालिकाले जनाएको छ ।
वीरगन्ज महानगरपालिकाको शैक्षिक प्रशासन महाशाखा प्रमुख आनन्द लामिछानेले एक सूचना जारी गर्दै सामुदायिक विद्यालयका शिक्षकहरूले विद्यालय व्यवस्थापन समिति र स्थानीय तहको स्वीकृति नलिई विद्यालय बाहिर काम गरेको तथा आफ्नो विद्यालयको पठन–पाठनमा अनियमित हुने गरेको पाइएको जनाएका छन् ।
उक्त सूचनामा भनिएको छ–आइन्दा त्यस प्रकारको कार्य नगर्न नगराउनु हुन तथा शिक्षा नियमावली, २०५९ को नियम १३३ (ज) र वीरगन्ज महानगरपालिकाको शिक्षा नियमावली, २०७४ को नियम १०४ (ज) बमोजिमको शिक्षकले पालना गर्नुपर्ने आचार संहिता अनिवार्य रुपमा पालना गर्नु गराउनु हुन अनुरोध छ ।’
शिक्षा नियमावली, २०५९ को नियम १३३ (ज) मा सामुदायिक विद्यालयका शिक्षकले व्यवस्थापन समिति र जिल्ला शिक्षा अधिकारीको स्वीकृति नलिइ आँफु वहाल रहेकोे विद्यालय बाहिर काम गर्न नहुने उल्लेख गरिएको छ ।
शिक्षा महाशाखा प्रमुख लामिछानेलले सामुदायिक विद्यालयका शिक्षकले आँफु कार्यरत रहेको विद्यालय बाहेक अन्य विद्यालयमा काम गरेको पाइएमा प्रचलित नियमानुसार कार्वाही प्रक्रिया अगाडी बढाइने चेतावनी पनि उक्त सूचनामार्फत दिएका छन् ।
