वीरगन्ज,२७फागुन:जिल्ला प्रशासन कार्यालय पर्साले पर्सा जिल्लामा खाना पकाउने एलपी ग्यास, पेट्रोल र डिजेलको अभाव नरहेकोले अनावश्यक रुपमा जगेडा (भण्डारण) नगर्न सर्वसाधारणलाई आग्रह गरेको छ।
बुधबार पर्साका निमित्त प्रमुख जिल्ला अधिकारी विनोद कुमार पोखरेलको अध्यक्षतामा बसेको बैठकले ग्यास तथा पेट्रोलियम पदार्थको अभाव तथा उपभोक्ता हित विपरीतका गतिविधि नियन्त्रण र न्यूनीकरणका विषयमा छलफल गर्दै विभिन्न निर्णय गरेको हो।
बैठकमा नेपाल आयल निगम तथा ग्यास विक्रेता संघ र उद्योगहरुले उपलब्ध गराएको विवरण अनुसार पर्सा जिल्लामा ग्यास, डिजेल र पेट्रोलको मौज्दात पर्याप्त रहेको तथा आयात पनि नियमित रुपमा भइरहेको जानकारी गराइएको थियो ।त्यसकारण जिल्लामा हाल कुनै पनि किसिमको अभाव नरहेको र भविष्यमा पनि अभाव हुने सम्भावना नदेखिएको निष्कर्ष निकालिएको स्थानीय प्रशासनले जनाएको छ ।
बैठकले अनावश्यक रुपमा ग्यास, डिजेल र पेट्रोलको जम्माखोरी गर्ने तथा कृत्रिम अभाव सिर्जना गर्ने कार्य नगर्न र नगराउन सार्वजनिक सूचना जारी गर्ने निर्णय पनि गरेको छ। साथै डिजेल र पेट्रोलको खुला बिक्री वितरण (ग्यालेन, ड्रम आदि मार्फत) नगर्न तथा नगराउन समेत निर्णय गरिएको छ।
त्यसैगरी ग्यास डिलरहरुले आफूले बिक्री वितरण गरेको उपभोक्ताको नाम, थर, ठेगाना र सम्पर्क नम्बर सहितको विवरण दैनिक रुपमा ग्यास उद्योगमा उपलब्ध गराउने तथा ग्यास उद्योगहरुले आफ्ना डिलरहरुलाई बिक्री गरेको ग्यास सिलिण्डरको परिमाण सहितको विवरण दैनिक रुपमा जिल्ला प्रशासन कार्यालय, वाणिज्य आपूर्ति तथा उपभोक्ता संरक्षण कार्यालय वीरगंज तथा नेपाल आयल निगम शाखा कार्यालय पर्सामा इमेलमार्फत अनिवार्य रुपमा जानकारी गराउने निर्णय गरिएको छ।
जिल्ला प्रशासन कार्यालयमा बसेको उक्त बैठकमा जिल्ला प्रहरी कार्यालय पर्साका प्रहरी नायब उपरीक्षक राजु कार्की, वाणिज्य आपूर्ति तथा उपभोक्ता संरक्षण कार्यालय वीरगन्जका सुनिल चौरसिया, नेपाल आयल निगमका मोहन कुमार सिंह, वीरगन्ज उद्योग वाणिज्य संघका मनोज कुमार दास तथा उपभोक्ता मञ्च नेपालका दिना गुप्ता लगायतको उपस्थिति रहेको थियो।