फाइल फोटो।
वीरगन्ज,१८पुषःवीरगन्ज उद्योग वाणिज्य संघले बारा–पर्सा औद्योगिक करिडोरका उद्योगहरुमा काटिएको विद्युत् लाइन जोडिदिन माग गरेको छ ।
संघले मंगलबार आयोजना गरेको पत्रकार सम्मेलनमा संघका अध्यक्ष अनिलकुमार अग्रवालले उद्योगहरूको विद्युत् लाइन काटिएका कारण मुलुकभरि भइरहेको भौतिक पूर्वाधार निर्माणलगायत कामसमेत अवरुद्ध भइरहेकाले उद्योगहरूमा बिजुली आपूर्ति गरिनुपर्ने माग गरे ।
‘यसो नगरे मन्दीको मारले थलिएका उद्योग सधैंका लागि बन्द हुन सक्छ । तिनमा कार्यरत २० देखि २५ हजार श्रमिकले रोजगारी गुमाउने दिन टाढा छैन,’ उनले भने, ‘उद्योगमा लगानी गरेका बैंकसमेत समस्यामा पर्छन् । अर्थतन्त्रमा पनि गम्भीर नकारात्मक असर पर्न जाने निश्चित छ ।’
विद्युत् महसुलमा नेपाल विद्युत् प्राधिकरणको अव्यावहारिक नीतिका कारण औद्योगिक ग्राहक अन्यायमा परेको उनको भनाइ छ । प्राधिकरणले हालसम्म २३ उद्योगको लाइन काटिसकेको र तीमध्ये पर्सा÷बारा औद्योगिक कोरिडोरका ठूला उद्योग पनि रहेको अग्रवालले जनाए । ‘लाइन काटिएका उद्योगको उत्पादन बन्द हुँदा कामदार सडकमा उत्रिएको अवस्था छ,’ उनले भने, ‘आर्थिक मन्दीले उद्योग व्यापार धराशायी हुने अवस्थामा पुगेका बेला बिजुलीको समस्याले औद्योगिक वातावरण बिगार्ने जोखिम बढेको छ ।’
उद्योगीहरूले डेकिकेटेड र ट्रंकलाइनबाट खपत गरेको महसुल कहिल्यै तिर्दैनौं नभनेको संघका द्वितीय उपाध्यक्ष माधव राजपालले बताए । उपभोग नै नगरेको विद्युत्को महसुल जबर्जस्ती तिराउन खोजिनु अन्यायपूर्ण हो भन्नेमा मात्रै निजी क्षेत्रको अडान रहेको उनको भनाइ छ ।साभार ः ईकान्तिपुरबाट