वीरगन्ज,१असारःपर्साको सखुवाप्रसौनी गाउँपालिकाका भूमिहिन दलित, भूमिहिन सुकुमबासी तथा अव्यवस्थित बसोबासीले यही असार १६ गतेदेखि जग्गाको निस्सा प्राप्त गर्ने भएका छन् । आइतबार गाउँपालिका कार्यालयमा भूमि समस्या समाधान आयोग पर्सा र गाँउपालिकाका जनप्रतिनिधिबीच भएको छलफलबाट उक्त निर्णय गरिएको हो ।
गाउँपालिका अध्यक्ष यशवन्त यादवको अध्यक्षतामा बसेको बैठकले आयोगसंग सहकार्य गर्दै भूमीहिनहरुको व्यवस्थापन यथाशीघ्र गर्ने निर्णय गरेको छ । बैठकमा गाँउपालिका अध्यक्ष यादवले गाँउपालिकाले आयोगको काममा पूर्ण प्रतिबद्धताका साथ सहयोग गर्ने बताए । “यो केवल जग्गाको मात्र विषय होइन, सामाजिक न्यायको ऐतिहासिक कार्य हो,” अध्यक्ष यादवले भने ।
भूमि समस्या समाधान आयोग पर्साका अध्यक्ष तबरेज अहमदका अनुसार सखुवाप्रसौनी गाँउपालिकामा हालसम्म ६५५ जनाले निवेदन दर्ता गरेका छन् । तीमध्ये १४० जना भूमिहिन दलित, ३४१ जना भूमिहिन सुकुमबासी र १७४ जना अव्यवस्थित बसोबासी रहेका छन् । अध्यक्ष अहमदले निस्सा वितरणपछि जग्गा वितरणको कार्यसमेत तीव्र गतिमा अघि बढाइने जानकारी दिए ।
कार्यक्रममा गाउँपालिकाकी उपाध्यक्ष शर्मिला बिष्ट महतो, वडा अध्यक्षहरु, कार्यपालिका सदस्य, कर्मचारी तथा आयोगका सदस्यहरुको समेत उपस्थिति रहेको थियो ।