वीरगन्ज,१७मंसिरःसहकारीको रकम अपचलन मुद्दामा पूर्वगृहमन्त्री तथा रास्वपाका सभापति रवि लामिछानेसहित तीनजनालाई पक्राउ गर्न जिल्ला प्रहरी कार्यालय पर्साले पनि अदालतसँग अनुमति माग गरेको खबर अनलाइन न्यूज पोर्टल नेपाल प्रेसले समाचार लेखेको छ ।
वीरगन्ज महानगरपालिका वडा नम्बर ६, आदर्शनगरमा सञ्चालित सानो पाइला बचत तथा ऋृण सहकारी संस्थाबाट अवैध तबरले गोर्खा मिडिया नेटवर्क प्रालिमा ८ करोड ५८ लाख ४४ हजार रूपैयाँ प्रवाह गरिएको समाचार यसअघि प्रकाशन भएको थियो ।
सानोपाइला सहकारीका अध्यक्ष जीवी राई हुन् ।जिल्ला प्रहरी कार्यालय पर्साले गोर्खा मिडियाका प्रवन्ध निर्देशकको हैसियतले लामिछाने, राई र पूर्वडीआईजी छविलाल बन्जाडे जोशीका विरुद्ध पक्राउ अनुमति माग गरी अनुसन्धान अगाडि बढाउन लागेको जिल्ला प्रहरी कार्यालय पर्साका प्रहरी उपरक्षिक कुमोध ढुंगेलले बताएको नेपाल प्रेसले सोमाबार प्रकाशन गरेको समाचारमा उल्लेख छ ।
‘हाम्रोतर्फबाट लेखापढी गरेर पर्सा जिल्ला अदालतमा पठाइसक्यौ, आजभोलिमै अनुमति आउँदैछ’, ढुंगेलले भनेको नेपाल प्रेसले जनाएको छ ।
सहकारी ठगीमा उक्त गिरोहमाथि अनुसन्धान गर्ने पर्सा पाचौं जिल्ला हो । यसअघि उनीहरूमाथि कास्की, रुपन्देही, काठमाडौं र चितवनका विभिन्न सहकारी ठगीमा अनुसन्धान चलिरहेको छ ।
वीरगन्जको सानो पाइला सहकारीबाट गोर्खा मिडियाको नाममा ग्लोबल आईएमईमा सञ्चालित बैंक खातामा रकम प्रवाह गरिएको कुरा संसदीय छानबिन विशेष समितिको प्रतिवेदनले औंल्याएको थियो । २०७८ वैशाखदेखि साउनसम्मको बैंकिङ कारोबारको विवरण (स्टेटमेन्ट) ले रकमको अपचलन पुष्टि गरेको प्रहरी उपरीक्षक ढुंगेलले बताएको नेपाल प्रेसले जनाएको छ ।
सहकारी पीडितको जाहेरीका आधारमा प्रहरीले अनुसन्धान गर्दा संस्थाकी उपाध्यक्ष तथा मिस नेपाल प्रतियोगिताकी पूर्वप्रतिस्पर्धी नेहा पौडेल आफैं प्रहरीमा उपस्थित भएकी थिइन् । सहकारीका कर्मचारी राधेचन्द्र यादव प्रहरीद्वारा पक्राउ गरिएका थिए ।
पर्सा जिल्ला अदालतले पौडेललाई गत साउन २१ गते १ करोड १० लाख धरौटीमा रिहा गरेको थियो । यादव पनि ३५ लाख धरौटीमा रिहा भएका थिए ।
तर मधेसखबरसंगको कुराकानीमा पर्साका प्रहरी उपरीक्षक ढुंगेलले भने पर्सा प्रहरीले अहिलेसम्म कसैलाईपनि पक्राउ गर्न अदालतसंग अनुमति नमागेको बताए ।
पर्सा प्रहरीले रवि लामिछानेसहितका तीनजनालाई पक्राउ गर्न अदालतसंग अनुमति मागेको छ नि त भन्ने प्रश्नमा प्रहरी उपरीक्षक ढुंगेलले भने,‘अहिलेसम्म पर्सा प्रहरीले अदालतसंग त्यस्तो कुनै अनुमति मागिसकेको छैन । अब कुन अनलाइनले के न्यूज लेख्यो त्यो मलाई थाहा भएन । मैले बोल्दै नबोलेको कुरा न्युजमा आउँछ भने त्यसको जवाफ म दिन सक्दिन । सानोपाइला सहकारी प्रकरणमा प्रहरीले आफनो प्रोसेस थालिसकेको छ । तर पक्राउ पूर्जीका लागि अदालतसंग अनुमति भने मागेको छैन ।’