वीरगन्ज,४ पुसःभारतसंगको सीमा जोडिएको पर्साको ठोरी गाँउपालिका वडा नम्बर ४ मालीबस्तीका किसानहरुको बाली सुरक्षाका लागि दशगजा क्षेत्रमा फलामे तारबार लगाइएको छ ।भारतीय सुरक्षाकर्मीकै सहमतिमा मालीबस्तीस्थित दशगजा क्षेत्रमा १ किलोमिटर सीमामा फलामे तारबार लगाइएको हो ।
सुर्य नेपाल प्रालिको आर्थिक सहयोगमा २५ लाख रुपैयाँ खर्च गरेर फलामे तारजाली लगाइएको स्थानीय किसान मोहन श्रेष्ठले जानकारी दिए ।
श्रेष्ठका अनुसार, सीमा क्षेत्रमा वन्यजन्तुले खेतीबाली नष्ट गर्ने समस्या गम्भीर बन्दै गएपछि किसानहरुले सुर्य नेपालसंग ३ किमी सीमा क्षेत्रमा फलामे तार जाली निर्माण गरी उपलब्ध गराइदिन अनुरोध गरेकोमा पहिलो चरणमा अहिले १ किमी तारजाली निर्माण गरि छेकबार लगाइएको हो । बाँकी दुइइ किलोमिटर क्षेत्रमा पनि क्रमशः तारजालीको छेकबार लगाउने योजना रहेको उनले जानकारी दिए ।
मालीबस्तीमा जंगली जनावरले किसानको खेतमा पसेर बाली क्षति पुर्याउँदै आएका छन् । यस्तै त्यहि क्षेत्रमा बाघको आक्रमणबाट दुई जना मानिसको ज्यानसमेत गइसकेको छ । यही कारण किसानहरुले सुर्य नेपालसँग ३ किमी क्षेत्रमा फलामे तारजाली निर्माणका लागि अनुरोध गरेका थिए ।
नेपाल–भारत दुवै पक्षका सीमा सुरक्षा बलको सहमतिको आधारमा सीमा क्षेत्रमा तारजाली निर्माण गरिएकोले सीमा क्षेत्रमा कुनै विवाद उत्पन्न नभएको श्रेष्ठले बताए।