मधेसखबर
वीरगन्ज, १८ बैशाख : नेपालका इन्टरनेट कम्पनिहरुले देशभर इन्टरनेट सेवा बन्द हुन सक्ने अवस्था आउन लागेको भनेर दिएको चेतावनी प्रति कम्युटर एसोसिएशन अफ नेपाल (क्यान) महासंघले गम्भीर ध्यानाकर्षण भएको जनाएको छ ।
क्यान महासंघले आइतबार दिउँसो एक विज्ञप्ति निकालेर , इन्टरनेट सेवा प्रदायक र राज्यको आपसी मतभेदका कारण अर्को हप्ता देखि देशभर इन्टरनेट सेवा बन्द हुन सक्ने अवस्था आउनु दुखद भएको जनाएको छ ।
क्यान महासंघका महासचिव नारायण थापाले इन्टरनेट सेवा प्रदायकले विदेशबाट ब्यान्डविथ खरिद गरेबापतको डलर भुक्तानीका लागि सरकारले सिफारिस नगरेको र महालेखाको बेरुजुलाई आधार बनाएर विभिन्न निकायबीच भइरहेको विवादका कारण इन्टरनेट सेवा बन्द हुने अवस्था आउनु दुःखद भएको बताएका हुन् ।
क्यान महासंघले इन्टरनेट जस्तो अत्यावश्यक सेवा बन्द हुनुअघि नै सम्बन्धित निकायले समस्याको समाधान गर्न पनि आग्रह गरेको छ ।
इन्टरनेट ब्यान्डविथ खरिदबापतको रकम विदेश पठाउन सरकारले सहयोग नगरेको भन्दै इन्टरनेट सेवा प्रदायकहरूको संस्था आइस्पानले शनिबार विज्ञप्ति निकालेर चुनावका बेला देशभरको इन्टरनेट बन्द हुन सक्ने चेतावनी दिइसकेको छ ।