वीरगन्ज, ४ वैशाख : एसइई परीक्षा दिएका विद्यार्थी तथा उनीहरूका अभिभावकलाई लक्षित गर्दै वीरगन्जमा आयोजना हुन लागेको ‘भविष्य मेला २०२६’ मा सहभागी हुने विद्यार्थीहरूका लागि आकर्षक पुरस्कारको व्यवस्था गरिएको छ ।
आयोजक एड्स बी मिडियाका अनुसार, मेलामा गोला प्रथा मार्फत एक जना विद्यार्थीले मोबाइल फोन, १० जनाले एयरबड्स, १० जनाले पावर बैंक, १० जनाले स्मार्ट वाचलगायतका सामग्री जित्ने मौका रहेको छ । कार्यक्रमको साँझ नै विजेता घोषणा गरिने आयोजकले जनाएका छन् ।
आगामी वैशाख ५ गते शनिबार वीरगन्जको सिद्धार्थ दियालो होटेलमा बिहान ९ बजेदेखि साँझ ६ बजेसम्म सञ्चालन हुने एक दिने शैक्षिक तथा करियर मेलाले ८ हजारभन्दा बढी विद्यार्थी र अभिभावकलाई प्रत्यक्ष रूपमा जोड्ने अपेक्षा गरिएको छ ।
“भविष्य मेला केवल शैक्षिक प्रदर्शनी होइन, यो विद्यार्थीहरूको शैक्षिक, व्यावसायिक र व्यक्तिगत भविष्य निर्माण गर्ने परिवर्तनकारी मञ्च हो । पुरस्कारको व्यवस्थाले विद्यार्थीहरूलाई थप उत्साह प्रदान गर्नेछ र उनीहरूलाई करियर छनोटमा सहयोग पुग्ने विश्वास छ,” कार्यक्रम निर्देशक नवीन कार्कीले भने ।
मेलामा विज्ञान, व्यवस्थापन, कानुन, पत्रकारिता, इन्जिनियरिङ, चिकित्सा, व्यावसायिक शिक्षा लगायत विभिन्न प्राविधिक विषयमा निःशुल्क करियर काउन्सिलिङ, विषय छनोटमा मार्गदर्शन, छात्रवृत्तिका अवसर र शैक्षिक संस्थाहरूको जानकारी उपलब्ध हुनेछ । सहभागी कलेजहरूले पूर्णदेखि आंशिक छात्रवृत्ति पनि घोषणा गर्ने छन् ।
पहिलो संस्करण गत वर्ष वीरगन्जको टाउन हलमा आयोजना भएको थियो,जसमा १० जिल्लाबाट ५ हजारभन्दा बढी विद्यार्थी सहभागी भएका थिए । दोस्रो संस्करणलाई अझ भव्य र व्यवस्थित बनाउने तयारी रहेको आयोजकको भनाइ छ ।
भविक्ष्य मेलामा विद्यार्थीहरूको लागि निःशुल्क डिम्याट खाता, निःशुल्क बैंक खाता, निःशुल्क आँखा जाँच शिविर साथै स्टेशनरी किट, शैक्षिक किताब र टेक ग्याजेटसमेत उपलब्ध हुनेछन् ।
वीरगन्ज महानगरपालिका, प्याब्सन पर्सा, एनप्याब्सन पर्सा, हिसान पर्सा, वीरगञ्ज उद्योग वाणिज्य संघ लगायतका संस्थाहरूको सहकार्यमा आयोजना हुन लागेको मेलाले पर्सा, बारा, रौतहट र आसपासका ग्रामीण तथा सहरी क्षेत्रका विद्यार्थीहरूलाई शैक्षिक समानता र करियर तयारीमा ठूलो योगदान पु¥याउने अपेक्षा गरिएको छ ।एसइई दिएका विद्यार्थी, अभिभावक तथा शैक्षिक संस्थाहरूलाई मेलामा सहभागी हुन आयोजकले हार्दिक निमन्त्रणा गरेका छन् ।