वीरगन्ज,७ फागुनः पर्साको बिन्दवासिनी गाँउपालिकाका जसपाका युवा नेता तथा गाँउपालिका अध्यक्षका प्रत्याशीसमेत रहेका मधुसुदन चौरसिया नेकपा एमालेमा प्रवेश गरेका छन् । चौरसिया,२०७९ को स्थानीय तह निर्वाचनमा तत्कालीन नेपाल सुशासन पार्टीका तर्फबाट बिन्दवासिनी गाँउपालिकाको अध्यक्षमा चुनाव लडेका थिए ।
बिहीबार काठमाडौंमा आयोजित कार्यक्रममा चौरसिया एमालेमा प्रवेश गरेका हुन् । एमाले अध्यक्ष केपी शर्मा ओलीले चौरसियालाई खादा लगाएर पार्टीमा स्वागत गरे । उक्त कार्यक्रममै चौरसियासंगै वकिल मियाँ, नन्दु साह कानु, सोयल अख्तर, प्रभु बैठा लगायतका नेताहरू पनि एमालेमा प्रवेश गरेका छन् ।
चौरसियासहितका नवप्रवेशीहरुलाई पार्टीमा स्वागत गर्दै ओलीले देशको समृद्धि, सुशासन र विकासका लागि एमाले नै सक्षम र भरोसायोग्य राजनीतिक शक्ति भएको बताए । उनले पर्सा–३ बाट एमालेमा प्रवेश गरेका युवा नेता चौरसिया लगायतका नवप्रवेशी नेताहरूको आगमनले पार्टी अझ सशक्त बन्ने विश्वास व्यक्त गरे ।
उक्त कार्यक्रममा एमालेका केन्द्रीय सदस्य तथा पर्सा जिल्ला इन्चार्ज प्रभु हजरा, मधेस प्रदेश उपाध्यक्ष विचारी यादव लगायतकाकोपनि सहभागिता थियो ।