वीरगन्ज,१४पुसःवीरगन्जमा केहि वर्षयता देखि विशेष गरी गर्मीको मौसममा हुदैं आएको खानेपानी अभावको समस्या दीर्घकालिन समाधानको प्रकृया सुरु भएको छ ।
संघीय सरकारमा खानेपानी मन्त्रीमा रहदाँ पर्सा क्षेत्र नम्बर १ का निवर्तमान सांसद प्रदीप यादवले अघि सारेको “वीरगन्ज खानेपानी वितरण प्रणाली” परियोजना कार्यन्वयनको प्रकृया सुरु भएको हो । उक्त परियोजना निर्माणका लागि महानगरपालिकाले ठेक्का आह्वान गरेको छ ।
विगत चार वर्षदेखि विशेष गरी गर्मीयाममा खानेपानीको विकराल समस्या झेल्दै आएका वीरगन्ज्बासीलाई २४ घण्टे सुरक्षित तथा शुद्ध खानेपानी उपलब्ध गराउने महत्वकांक्षी पूर्वमन्त्री यादवले आँफु खानेपानी मन्त्रीमै रहदाँ अगाडि सारेका थिए ।
उक्त परियोजना अन्तर्गत वीरगन्ज महानगरपालिकाको वडा नम्बर १ देखि १४, १६ र २४ सम्मका शहरी क्षेत्रमा पाँच वटा आधुनिक ओभर हेड ट्यांकी निर्माण गरिनेछ ।ती ओभर हेड ट्यांकीहरू चिनीमील, पदम रोड, वडा नम्बर २४, जिल्ला प्रशासन कार्यालय पर्साको पछाडि र आदर्शनगरमा निर्माण गरिने छ । प्रत्येक ट्यांकीको क्षमता ३ देखि ८ लाख लिटरसम्म हुनेछ । साथै, शहरभरि ३२२ किलोमिटर लम्बाईमा उच्च गुणस्तरको पाइपलाइन विस्तार पनि गरिने र त्यही पाइपबाट महानगरका १६ वटा वडामा खानेपानी वितरण गरिने बताइएको छ ।
एसियाली विकास बैङ्क (एडिबी) को सहकार्यमा निर्माण गर्न लागिएको उक्त परियोजनामा पाइप लाइनमार्फत वितरण गरिने पानीको उच्च प्रविधिको प्रयोग गरी नियमित निरीक्षण गर्नुका साथै समयसमयमा पाइपलाइनको मर्मत सम्भारपनि गरिने उल्लेख छ ।जसका कारण पाइप फुट्ने, लिकेज हुने जस्ता पुराना समस्याहरू पूर्ण रूपमा निर्मूल हुनेछन् ।
उनको दूरगामी सोच र विभिन्न दातृ निकायसँगको प्रभावकारी संवादले नै एसियाली विकास बैङ्क (एडिबी) को ठुलो लगानी यो परियोजनामा सम्भव भएको हो ।
पूर्वमन्त्री यादवले महत्वकांक्षी परियोजना निर्माणभई सञ्चालनमा आएपछि वीरगन्जमा वर्षौदेखिको खानेपानीको समस्या दीर्घकालिन रुपमा समाधान हुने बताएका छन् । साथै यसले वीरगन्जका लाखौँ नागरिकले शुद्ध र नियमित खानेपानी पाउने मात्र नभई स्वास्थ्य, सरसफाइ र जीवनस्तरमा पनि उल्लेखनीय सुधार आउने अपेक्षा गरिएको उनले बताएका छन् ।