काठमाडौं,२१असोजःसरकारले करिब डेढमहिना पहिले वीरगन्जमा फैलिएको हैजाको प्रकोप नियन्त्रणका लागि विदेशबाट १० लाख मात्रा (डोज) हैजा विरुद्धको खोप ल्याएको छ । हैजा विरुद्धको १० लाख १८ हजार १ सय मात्रा खोप ल्याइएको स्वास्थ्य तथा जनसंख्या मन्त्रालयकोे परिवार कल्याण महाशाखाका अन्तर्गत खोपका शाखाका प्रमुख डाक्टर अभियान गौतमले जानकारी दिए ।
अर्को हप्तादेखि हैजाविरुद्धको खोप अभियान पर्सा र बारा जिल्लाका प्रभावित स्थानीय तहमा सञ्चालन गरिने डा.गौतमले बताए ।मुखबाट सेवन गरिने (ओरल) यो खोपको एकै डोजले महामारी नियन्त्रणमा सहयोग पुग्ने डा.गौतमले बताए ।
यस्तै हैजाविरुद्धको खोप एक वर्षभन्दा माथिका सबै व्यक्तिलाई दिइनेछ । उच्च सङ्क्रमण भई अस्पतालमा उपचाररत, ज्वरो आएका वा झाडापखाला भइरहेका बिरामीहरूले भने यो खोप लिन नमिल्ने उनले बताए ।
खोप विद्यालय, कलेज, कार्यालय, घरदैलो र स्वास्थ्य संस्थाहरूमार्फत उपलब्ध गराइनेछ । यो खोप सरकारले खरिद नगरी इन्टरनेस्नल कोडिनेसन ग्रुप आईसीजी मार्फत अनुदानमा प्राप्त भएको हो ।जसमा गाभी, विश्व स्वास्थ्य सङ्गठन, युनिसेफ र अन्तर्राष्ट्रिय रेडक्रस तथा रेड क्रिसेन्ट सोसाइटीजको महासंघ जस्ता संस्थाहरू संलग्न छन् ।
वीरगन्जसहित पर्सामा डेढ महिनापहिले फैलिएको हैजाको प्रकोप अहिले पनि छिटफुट रुपमा जारी रहे पनि यसको स्रोत अझै पत्ता लाग्न सकेको छैन । दूषित पानी तथा खानाबाट यो रोग फैलिने भए पनि पानीमा हैजाको ब्याक्टेरिया पत्ता लगाउन गाह्रो भइरहेको स्वास्थ्य तथा जनसंख्या मन्त्रालयले बताउँदै आएको छ ।
यस्तै, हैजा प्रभावित क्षेत्र वीरगन्जको नारायणी अस्पतालमा दैनिक ४–५ जना झाडापखालाका बिरामी उपचारका लागि अस्पताल आउने गरेको अस्पतालका प्रमुख मेसु डा. चुमनलाल दासले बताए ।साभारःरातोपाटी