वीरगन्ज,१५असाेज:पर्साकाे ठोरी गाउँपालिका–४ निर्मलवस्तीका युवाहरुले यस वर्षको दशैंलाई फरक र अनुकरणीय शैलीमा मनाएका छन् ।उनीहरुले ठोरी–१ भवाननगरस्थित वृद्धाश्रममा पुगेर ज्येष्ठ नागरिकसँग दशैंको खुशी साझा गर्दै खाद्यान्न, उपहार र नगद सहयोग हस्तान्तरण गरेका हुन् ।
निर्मलवस्ती युवा समाजले आश्रममा २० केजीकाे खसी, ७ बोरा चामल, एक कार्टुन तेल, १० केजी चिउरा, एक कार्टुन चाउचाउ, ५ केजी दालमोट, ५ केजी चिनी, एक कार्टुन फ्रुटी, १० केजी दाल, कपडा धुने १२ थान साबुन, नुहाउने १२ थान साबुन, ४० प्याकेट बिस्कुट, ५ केजी नुन, २ केजी चिया पत्ती, ३ वटा ग्यास सिलिन्डर, केरासहितका फलफूल र स्याउ प्रदान गरेका हुन् । साथै आश्रममा बसोबास गर्ने प्रत्येकलाई खादा लगाई जनही नगद ५ सय रुपैयाँ समेत प्रदान गरिएको थियाे ।
आश्रममा सामग्री र नगद मिलाएर करिब ५७ हजार रुपैयाँ बराबरको सहयोग गरिएको निर्मलबस्ती युवा समाजले जनाएको छ ।
दशैंलाई केवल परिवारमा रमाउने चाड नभई, समाजका उपेक्षित वर्गसँग खुशी बाँड्ने चाडका रुपमा स्थापित गर्न सकिन्छ भन्ने सन्देश दिन उक्त सहयाेग गरिएको समाजकाे भनाइ छ । युवाहरुको यो रचनात्मक पहलले समाजमा सकारात्मक भावनाको सन्देश प्रवाह गर्नुका साथै समाजसेवातर्फ पनि आकर्षित गर्ने प्रेरणा दिएको समाजले जनाएको छ ।साभार: सामुदायिक रेडियो विजयबस्ती