वीरगन्ज,२७जेठ: वीरगन्जमा आगामी जेठ ३० गते आयोजना हुने ‘भविष्य मेला २०२५’ मा सहभागी हुने माध्यमिक शिक्षा परीक्षा (एसइई) दिएका विद्यार्थीहरूका लागि एबीसी सेक्युरीटीज प्रालिले निःशुल्क डिम्याट खाता खोल्ने भएको छ ।
नि:शुल्क डी-म्याट खाता खोल्ने सुविधा प्रदान गर्न मंगलबार एबीसी सेक्युरीटीजका वीरगन्ज शाखा प्रमुख दीपल खन्ना र भविष्य मेलाका निर्देशक नवीन कार्कीबिच सम्झौतामा हस्ताक्षर भएको छ ।
जेठ ३० गते शुक्रवार बिहान ९ बजेदेखि साँझ ५ बजेसम्म सञ्चालन हुने एक दिने शैक्षिक तथा करियर मेलाले पर्सा, बारा, रौतहट र आसपासका क्षेत्रका तीन हजारभन्दा बढी विद्यार्थी र अभिभावकलाई जोड्ने अपेक्षा गरिएको छ।
मेलाले विज्ञान, व्यवस्थापन, कानुन, पत्रकारिता, इन्जिनियरिङ, चिकित्सा, व्यावसायिक तथा प्राविधिक शिक्षालगायत विभिन्न क्षेत्रबारे जानकारी प्रदान गर्दै विद्यार्थीहरूलाई उनीहरूको रुचि र क्षमताअनुसार शैक्षिक संस्था छनोट गर्न मार्गदर्शन गर्नेछ ।
एबीसी सक्युरीटीज प्रालिसँगको सम्झौताले मेलामा सहभागी विद्यार्थीहरूलाई वित्तीय साक्षरता र शेयर कारोबारको अवसर प्रदान गर्नेछ । “यो पहलले विद्यार्थीहरूलाई वित्तीय रूपमा सचेत र आत्मनिर्भर बनाउन सहयोग गर्नेछ,” शाखा प्रमुख दीपल खन्नाले भने ।
निर्देशक नवीन कार्कीका अनुसार, सहकार्य शैक्षिक र वित्तीय जागरूकताको संयोजन भएको बताए । “हामी विद्यार्थीहरूलाई शैक्षिक अवसरसँगै वित्तीय साक्षरताको महत्त्व बुझाउन प्रतिबद्ध छौँ । एबीसी सक्युरीटीजसँगको सम्झौताले हाम्रो लक्ष्यलाई थप सशक्त बनाएको छ,” उनले भने ।
मेलामा निःशुल्क डिम्याट खातासहित निःशुल्क बैंक खाता, आँखा जाँच शिविर, नि:शुल्क नेपाली टेलिकमको सिम कार्ड, मेरिट र आवश्यकतामा आधारित छात्रवृत्ति, स्टेशनरी किट, शैक्षिक किताब र टेक ग्याजेटहरू उपलब्ध हुनेछन् । भविष्य मेलामा उपलब्ध सुविधाहरूले विद्यार्थीहरूको शैक्षिक र व्यावसायिक भविष्य निर्माणमा महत्त्वपूर्ण योगदान पुर्याउने अपेक्षा छ ।
“भविष्य मेला विद्यार्थीहरूका लागि अवसरको ढोका हो । एबीसी सक्युरीटीजसँगको सहकार्यले मेलालाई थप प्रभावकारी बनाउनेछ,” कार्कीले थपे । मेलाले वीरगञ्ज र आसपासका क्षेत्रका ग्रामीण र सहरी समुदायका विद्यार्थीहरूलाई शैक्षिक समानता र करियर तयारीमा सहयोग पुर्याउने लक्ष्य राखेको छ ।
वीरगन्ज र आसपासका विद्यार्थी, अभिभावक, शैक्षिक संस्था र स्थानीय व्यवसायलाई मेलामा सहभागी हुन आयोजकले निमन्त्रणा गरेको छ । मेलाले वीरगन्जलाई क्षेत्रीय शैक्षिक हबको रूपमा स्थापित गर्न र स्थानीय युवाहरूलाई सशक्त बनाउन महत्त्वपूर्ण भूमिका खेल्ने विश्वास गरिएको छ ।
पर्सा, बारा र रौतहटमा उच्च माध्यमिक शिक्षाबारे जानकारीको कमी रहेको कुरालाई मेलाले सम्बोधन गर्नेछ । “धेरै विद्यार्थी र अभिभावक शैक्षिक विकल्प र करियर सम्भावनाबारे अनभिज्ञ छन् । मेलाले उनीहरूको मनमा रहेको अन्योल हटाउनेछ,” कार्कीले भने । मेलाले विद्यार्थीहरूलाई उनीहरूको रुचि र आर्थिक अवस्थासँग मेल खाने संस्था छनोट गर्न सहयोग गर्नेछ भने शैक्षिक संस्थाहरूलाई योग्य र उत्साही विद्यार्थीहरूसँग जोड्ने पुल बन्नेछ ।
वीरगन्जका निजी र सामुदायिक विद्यालयहरू, स्थानीय व्यवसाय, र समुदायको सहभागिताले मेलालाई थप जीवन्त बनाउनेछ । स्थानीय युवा नेता राकेश यादवले मेलाको महत्त्वलाई यसरी व्यक्त गरे, “मेलाले हाम्रा विद्यार्थीलाई आफ्नै सहरमा अवसरको संसार देखाउनेछ । वीरगञ्जलाई शैक्षिक हब बनाउने यो एउटा ठूलो कदम हो ।”
“मेला केवल एक कार्यक्रम होइन, यो त हाम्रा युवाहरूको सपनालाई उडान दिने आन्दोलन हो,” कार्कीले उत्साहका साथ भने । स्थानीय व्यवसाय, मिडिया र समुदायको सहयोगले मेलाले वीरगन्जको सामाजिक-आर्थिक प्रगतिमा महत्त्वपूर्ण योगदान पुर्याउनेछ ।
स्थानीय अभिभावक सुनिता कुमारीले मेलाको अवधारणालाई हृदयदेखि स्वागत गरिन् । “हाम्रा छोराछोरीले आफ्नै सहरमा गुणस्तरीय शिक्षा र करियर अवसरबारे जानकारी पाउनेछन् । यो हाम्रो समुदायका लागि गर्वको कुरा हो,” उनले भनिन् ।