काठमाडौं,११असोजःराष्ट्रिय प्रजातन्त्र पार्टीले राजसंस्था पुनस्थापनाको मागसहित काठमाडौं केन्द्रितआन्दोलनको तयारीमा जुटेको छ ।राप्रपाले आन्दोलनको तयारीका लागि सबै जिल्ला कार्य समितिलाई परिपत्रपनि गरेको छ।
७७ वटै जिल्ला कार्यसमितिलाई पत्र लेख्दै आन्दोलनमा सक्रिय हुनेबारे राजनीतिक, परिचालन र व्यवस्थापनका प्राविधिक विषयहरूमा प्रशिक्षण समेत दिइने राप्रपाका महामन्त्री डा. धवलशम्सेर राणाले बताए ।
जिल्ला काार्य समितिलाई पठाइएको पत्रमा भनिएको छ–राजसंस्था, सनातन हिन्दू अधिराज्य, प्रदेशी खारेजी, भ्रष्टाचारको अन्त्यलगायत ४० बुँदे मागसहित राष्ट्रिय प्रजातन्त्र पार्टीले सडक संघर्ष जारी राखेको विदितै छ । यसै सन्दर्भमा केन्द्रीय कार्य समिति, कार्य सम्पादन समितिको निर्णयबमोजिम आन्दोलन निरन्तर राख्दै देशभरिका ६ हजार ७ सय ४३ वडाबाट कम्तीमा तीन जना वा बढीमा सके जति जुझारु सहयोद्धाहरू काठमाडौंँ केन्द्रित आन्दोलनमा सहभागी गराइनेछ ।’ आन्दोलन केन्द्रित प्रशिक्षण संचालन गर्न केन्द्रीय प्रशिक्षकहरू सबै जिल्लामा जाने समेत राणाले बताए ।
जिल्लाका प्रत्येक वडाबाट कम्तीमा तीन जना बढीमा सके जति जुझारु व्यक्तिहरू सहभागी गराई जिल्लास्तरीय प्रशिक्षण तिहार अगावै सम्पन्न गर्ने तिहार र छठ लगत्तै काठमाडौं केन्द्रित आन्दोलन आरम्भ गर्ने उनले बताए।