बारा,१६जेष्ठः बारामा प्रहरीले ठूलो परिमाणमा नेपाली नक्कली नोटसहित चार जनालाई पक्राउ गरेको छ । जिल्ला प्रहरी कार्यालय बाराबाट खटिएको प्रहरी टोलीले भारतसंग सीमा जोडिएको सिम्रौनगढको बँसबरिया गाँउबाट१३ लाख १६ हजार रुपैयाँ नक्कली नोटसहित चार जनालाई पक्राउ गरेको हो ।
पक्राउ पर्नेहरुमा बाराकै कोल्हबी नगरपालिका वडा नम्बर ६ का २५ बर्षिय राजन चौधरी, वडा नम्बर ५ का १९ बर्षिय आकाश चौधरी, रौतहटको राजपुर नगरपालिका वडा नम्बर १ का १९ बर्षिय मोहन कुमार साह र भारत बिहारको मोतिहारी जिल्लाको कबैया पञ्चायतका ४० बर्षिय महम्मद आलम रहेका छन् ।
बाराका प्रहरी नायब उपरीक्षक दधिराम न्यौपानेका अनुसार, विशेष सूचनाको आधारमा सोमबार अपरान्ह खटिएको प्रहरी टोलीले सिम्रौनगढ–९ बसबँरीया गाँउबाट राजन,आकाश र साहलाई नेपाली १ हजार दरको ७०७ थान नक्कली नोटसहित पक्राउ गरेको थियो । ना ३४ प ३५१२ र बीआर ०६ ए डब्लु २७५८ नम्बरको दुई वटा मोटरसाइकलमा भारतबाट नेपाल प्रवेश गर्दै गरेको अवस्थामा उनिहरुलाई प्रहरीले नियन्त्रणमा लिएको प्रहरी नायब उपरीक्षक न्यौपानेले बताए ।
उनिहरुले दिएकै बयानका आधारमा मंगलबार बसबरियाँ गाँउबाटै भारतीय नागरिक आलमलाई पनि नेपाली १ हजार दरका ६०९ थान नक्कली नोटसहित पक्राउ गरिएको उनले बताए । भारततर्फबाट साइकलमा नेपाल प्रवेश गरेका आलमलाई रोकेर खानतलासी गर्दा उनको साथबाट नक्कली नोट फेला परेपछि उनलाईपनि नियन्त्रणमा लिइएको न्यौपानले बताए ।
नक्कली नोटसहित पक्राउ परेका चारैै जनालाई जिल्ला प्रहरीको कार्यालय बाराको हिरासतमा राखेर थप अनुसन्धान भईरहेको प्रहरी नायब उपरीक्षक न्यौपानेले जानकारी दिए ।