रौतहट,३चैत:रौतहटमा शुक्रबार मनी ट्रान्सफर सञ्चालकमाथि गोली प्रहार गरेको आरोपमा पक्राउ परेका तीन जना भारतीय नागरिकलाई प्रहरीले शनिबार सार्वजनिक गरेको छ ।
शुक्रबार दिउँसो १ बजे रौतहटको परोहा नगरपालिका–९ रामपुरखापमा शिव मनी ट्रान्सफरका सञ्चालक २६ वर्षका नितेश साहमाथि लुटेरा समूहले गोली प्रहार गरेको थियो ।
घटनालगत्तै खटिएको प्रहरीले खोजतलास गर्दा तीन जना भारतीय नागरिक पक्राउ परेकाे जिल्ला प्रहरी कार्यालय रौतहटकी प्रहरी नायब उपरीक्षक एलिजा गिरीले जानकारी दिइन् ।
पक्राउ पर्नेमा भारतीय नागरिक १९ वर्षका मुनिफकुमार यादव, १८ वर्षका राजकुमार पासवान र २० वर्षका चन्द्रभान सिंह रहेका छन् ।
उनीहरुमाथि ज्यान मार्ने उद्योग, हातहतियार तथा खरखजाना र चोरीसम्बन्धी कसुरमा अनुसन्धान भइरहेको प्रहरीले जनाएको छ ।
उनीहरुको साथबाट प्रहरीले मोटरसाइकल, पेस्तोल गोली लगायतका सामान बरामद गरेको छ ।
गोली प्रहारबाट घाइते भएका नितेशको सुरुमा बाराको नाैतनस्थित एलएस न्यूरो अस्पतालमा उपचार गरिएको थियो ।
आँखामा समस्या देखिएकाले थप उपचारका लागि उनलाई काठमाडौंको तिलगंगा आँखा अस्पताल पठाइएको प्रहरी नायब उपरीक्षक गिरीले जानकारी दिइन् ।साभार:अनलाइनखबरबाट