मकवानपुर,२९फाल्गुन:हेटाैंडामा आयाेजित अष्टकुमारी स्मृति टी–२० अन्तर कलेज क्रिकेट क्रिकेट प्रतियोगिताको उपाधि वीरगन्जको नेशनल इन्फोटेक कलेजले जितेको छ ।हेटौंडाकाे हुप्रचौरमा मंगलबार भएको फाइनल खेलमा हेटौंडा स्कुल अफ म्यानेजेमेन्टलाई ४ विकेटले पराजित गर्दै वीरगन्जले उपाधि जितेकाे हाे।
हेटौंडाले दिएकाे १२१ रनकाे लक्ष्य वीरगन्जले १९.१ ओभरमा ६ विकेट गुमाएर पूरा गर्याे । वीरगन्जका लागि मन्थन यादवले सर्वाधिक ४३ रन जोडे ।
यसअघि पहिला व्याटिङ गर्दै हेटाैंडाले निर्धारित २० ओभरमा ८ विकेट गुमाएर १२० रन बनाएको थियो ।उसका लागि युविन बुढाथोकीले ४९ रनको योगदान गरेका थिए ।
प्रतियोगितामा वीरगन्जका मन्थन यादव सर्वोत्कृष्ट खेलाडी घोषित भए । नारायणी कलेज हेटौंडाका बलर अस्मितकुमार मण्डल र व्याटर युविन बुढाथोकी उत्कृष्ट घोषित भए ।
उपाधिसँगै वीरगन्जले नगद ५० र उपविजेता हेटौंडाले २५ हजार रुपैयाँ नगद हात पारेको छ ।
हेटाैंडा जेसिसले आयाेजना गरेकाे प्रतियोगितामा हेटौंडा, चितवन, बारा र पर्साका गरी ६ वटा कलेजको सहभागिता रहेको थियो ।