वीरगन्ज,१२असोज : वीरगन्जमा शुक्रबार कोहिनुर बचत तथा ऋण सहकारी संस्था लिमिटेडको आयोजनामा रक्तदान कार्यक्रम सम्पन्न भएको छ ।नेशनल मेडिकल कलेजको प्राङ्गणमा आयोजित रक्तदान कार्यक्रममा ३३ महिलासहित १५७ जनाले रगतदान गरेको नेशनल मेडिकल कलेजका प्रवक्ता सेराज अहमदले जानकारी दिए ।
नेशनल मेडिकल कलेजको सहकार्यमा आयोजित रक्तदान कार्यक्रममा सर्वसाधारण नागरिक, कलेजमा अध्ययनरत विद्यार्थी , चिकित्सक र सहकारी संस्थाका कर्मचारीहरूले रगतदान गरेका हुन् ।
रक्तदान कार्यक्रमको उद्घाटन गर्दै नेशनल मेडिकल कलेजका अध्यक्ष डाक्टर जैनुदिन अन्सारीले अमूल्य जीवन बचाउन रक्तदान कार्यक्रममा सहभागी भई रगतदान गर्नेहरुलाई धन्यवाद दिए । रक्तदान एउटा निःस्वार्थ समाज सेवा रहेको भन्दै उनले यसले मानव जीवनमा सकारात्मक प्रभाव पार्ने र मनमा ठूलो सन्तुष्टि दिनेपनि बताए ।
रक्तदान कार्यक्रममा कोहिनुर बचत तथा ऋण सहकारी संस्थाका महासचिव तथा नेशनल मेडिकल कलेजका मार्केटिङ डाइरेक्टर सहनवाज अंसारी , नेशनल मेडिकल कलेजका एडमिसन डाइरेक्टर आबिद हुसेन अन्सारी , एकेडेमी डाइरेक्टर डा. नुसरत जहान अंसारी , हस्पिटलका डाइरेक्टर डा. इसरत जहान अंसारी , भ्वाइस प्रिन्सिपल रवि शंकर गुप्ता लगायतको सहभागिता रहेको थियो ।