वीरगन्ज, २६ वैशाखः साताअघि बाराको निजगढ बजारमा राजमार्गमा एक बाँदर घाइते अवस्थामा रहेको सूचना पाएपछि पर्सा राष्ट्रिय निकुञ्ज आधाभार कार्यालयस्थित ‘वाइल्ड लाइफ रेस्क्यु टिम’ तत्कालै घटनास्थलमा पुग्यो । बाँदरको उपचार गरेर टोलीले प्राकृतिक बासस्थानमै छोडिदियो ।
वैशाख पहिलो साता वन्यजन्तु सप्ताह मनाउने क्रममा निकुञ्ज प्रशासनले कार्यालयमा यो टिम स्थापना गरेको हो । यसअघि कुनै वन्यजन्तुको उपचार गर्नु परे राष्ट्रिय प्रकृति संरक्षण कोष सौराहाको प्राविधिक टोलीलाई बोलाउनु पर्ने अवस्थाको अब अन्त्य भएको छ ।
निकुञ्ज प्रशासनले यस्तो टोली परिचालन गर्न थालेपछि वन्यजन्तुको उद्धार तथा उपचारमा समेत सहजता भएको छ । निकुञ्ज कार्यालयका संरक्षण एवम् सूचना अधिकृत सन्तोषकुमार भगतले उद्धार टोलीमा पशु चिकित्सक, प्राविधिक, सवारी चालक तथा आवश्यकता अनुसार थप कर्मचारी पनि परिचालन हुने गरेको जानकारी दिए । ‘सूचना पाउना साथ उद्धार टोली पर्सा,बारा, मकवानपुर, रौतहटसम्म पनि परिचालन हुने गरेको छ,’ उनले भने, ‘वन्यजन्तुको उद्धार र उपचारमा निक्कै सहजता भइरहेको छ ।’
यसअघि चैतसम्ममा निकुञ्ज प्रशासनले राष्ट्रिय प्राकृतिक संरक्षण कोष सौराहाको प्राविधिक टोली समेतको सहयोगमा निकुन्जको बिभिन्न स्थान तथा निकुञ्ज आसपासका क्षेत्रबाट समेत गरी १ पाटेबाघ, ६ चित्तल, १ सय बढी गोमनसहितका सर्प, २५ किंग कोब्रा, १५ अजिंगर, १ सालक, र निलगाई समेत अन्य ३ वन्यजन्तुको उद्धार तथा उपचारपछि प्राकृतिक बासस्थानमा छोडिसकेको छ ।
यो निकुञ्जमा महेन्द्र तथा त्रिभुवन राजपथ पनि पर्ने र यी राजमार्गका सवारी साधनको अत्यधिक चाप रहने गरेकाले सवारी साधनकै ठक्करमा पनि थुप्रै वन्यजन्तु पर्ने गरेका छन् । चालु आवमा हालसम्म सवारी साधनको ठक्कर तथा अन्य कारणले निकुञ्जमा १ चितुवा, २ जरायो, ५ चित्तल, १५ बादर र ३ अन्य वन्यजन्तु मरेका गतले जानकारी दिए । यस्ता घटना न्यूनीकरण गर्न वन्यजन्तु सप्ताहमा सवारी चालक, सहचालक तथा ट्राफिक प्रहरीलाई सचेतना गराउने गरिएको उनले बताए ।शंकर आर्चाय /कान्तिपुर