वीरगन्ज,२०चैतःट्राफिक प्रहरीले वीरगन्जमा पनि लागू पदार्थ सेवन (लापसे) गरी सवारी साधन चलाउने चालकहरुको चेकजाँच अयभान सुरु गरेको छ ।
शुक्रबार बिहान वीरगन्ज महानगरपालिका वडा नम्बर १४ गण्डक चोकमा ट्राफिक प्रहरीले लापसे चेकजाँच गर्दा ३ जना चालकले लागू पदार्थ सेवन गरेको फेला परेको जिल्ला ट्राफिक प्रहरी कार्यालय पर्साका प्रमुख युवराज कटुवालले जानकारी दिए ।
उनका अनुसार, शुक्रबार बिहान गण्डक चोकमा ३४ जना सवारी चालकको लापसे चेकजाँच गर्दा ती मध्ये ३ जना चालकले लागू पदार्थ सेवन गरेको भेटिएको हो । चेकजाँचका क्रममा ३ जना चालकमा लागू पदार्थ सेवन गरेको पुष्टि भएको ट्राफिक प्रहरीले जनाएको छ। ती चालकहरूविरुद्ध आवश्यक कानुनी कारबाहीका लागि प्रक्रिया अघि बढाइएको ट्राफिक प्रहरी निरीक्षक कटुवालले जानकारी दिए ।
सवारी दुर्घटना न्यूनीकरण गर्नुका साथै चालकहरूमा सचेतना अभिवृद्धि गर्ने उदेश्यले वीरगन्जमा लासपे चेकजाँच अभियान सञ्चालन गरिएको उनले बताए । उनले यो अभियानलाई वीरगन्जसहित पर्सा जिल्लका सबै ठाँउमा निरन्तरता दिइनेपनि जानकारी दिए ।