हेटौंडा,१२फागुनः अख्तियार दुरुपयोग अनुसन्धान आयोगको कार्यालय हेटौंडाले यातायात व्यवस्था कार्यालय हेटौंडामा कार्यरत छैटौं तहका अधिकृत अमृत भेटुवाल र एक बिचौलियालाई घुस रकमसहित नियन्त्रणमा लिएको छ।
सवारी सरुवा सहमतिको कामका लागि सेवाग्राहीसँग घुस माग गरेको उजुरीका आधारमा आइतबार अख्तियार दुरुपयोग अनुसन्धान आयोगको कार्यालय, हेटौंडाबाट खटिएको टोलीले बिचौलिया लेखापढी व्यवसायी खगेन्द्र पौडेललाई ११ हजार ५ सय रुपैयाँ लिइसकेको अवस्थामा पक्राउ गरेको हो।
आयोगले अधिकृत भेटुवाल र पौडेल दुवैलाई कार्यालय परिसरबाटै नियन्त्रणमा लिएको छ। यस्तै उनीहरूको साथमा रहेको ३ थान मोबाइल सेट नियन्त्रणमा लिई थप अनुसन्धान गरिरहेको आयोगले जनाएको छ।