वीरगन्ज,२६माघःवीरगन्ज महानगरपालिका वडा नम्बर १० आदर्शनगरस्थित ट्रान्सपोर्टमा छापा मार्न गएका सशस्त्र प्रहरीको टोलीलाई व्यपारीहरुले कुटेर लखेटेका छन् ।
आदर्शनगरस्थित एक घरमा विनोद साह कानु सञ्चालक रहेको सबिता ट्रेडर्सको गोदाममा सोमबार बिहान सशस्त्र प्रहरी नायब उपरीक्षक विकास अधिकारीको नेतृत्वमा सशस्त्र प्रहरीको टोली छापा मार्न गएको थियो ।
त्यसक्रममा भेलामा भएका व्यपारीहरुले सशस्त्र प्रहरीको टोलीमाथि जाइ लाग्दै आक्रमण गरेपछि सशस्त्र प्रहरीको भागाभाग भएको थियो ।व्यपारीहरुको आक्रमणबाट ३ जना सशस्त्र प्रहरी घाइते भएका छन् ।व्यपारीहरुले हानेको ढुंगाले लागेर सशस्त्र प्रहरीको गाडीको शीशापनि फुटेको छ ।
सशस्त्र प्रहरी प्रस्तावित सीमा सुरक्षा बल वीरगन्ज भन्सारका सशस्त्र प्रहरी नायव उपरीक्षक विकास अधिकारीका अनुसार, राजश्व छलेर भित्रयाइएको सामान गोदाममा भण्डारण गरेर राखिएको सूचना सशस्त्र प्रहरीलाई प्राप्त भएको थियो । उक्त सूचनाको आधारमा सोमबार बिहान सशस्त्र प्रहरी नायब उपरीक्षक अधिकारीकै कमाण्डमा दुई वटा गाडीमा सशस्त्र प्रहरीको टोली आदर्शनगरमा पुगेको थियो । सशस्त्र प्रहरीले गोदाममा खानतलासी गर्नका लागि प्रकृया सुरु गर्न खोजेपछि व्यपारीहरुले बिलबिजक आँफुहरुसंग भएपनि सशस्त्र प्रहरीले अनावश्यक रुपमा दुख दिन थालेकोभन्दै विवाद गरेका थिए । त्यसपछि सशस्त्र प्रहरीले गोदामको ढोकाको ताच्चा फुटाउन खोज्दा व्यपारीहरुले प्रतिवाद गर्दा अवस्था तनावग्रस्त बन्न पुगेको थियो ।
सशस्त्र प्रहरीले जबरजस्ति गर्न खोजेको भन्दै व्यपारीहरुले सशस्त्र प्रहरीको टोली र उनिहरु सवार भइ आएका दुई वटा गाडीमा बाँसको फाटा र ढुंगाले हान्न सुरु गरे गरेका थिए । त्यसपछि सशस्त्र प्रहरीको टोली गाडी लिएर त्यहाँबाट भागेका थिए ।
सशस्त्र प्रहरी नायब उपरीक्षक अधिकारीले भने, ‘ गोदामको खानतलासी लिने क्रममा केहि समुहबाट आक्रमण हुदाँ ३ जना सुरक्षाकर्मी घाइते भएका छन् ।उनिहरुको उपचार भइरहेकोछ । एउटा गाडीको शीशापनि फुटेको छ । उक्त गोदामबाट ७ लाख मूल्यको सामान नियन्त्रणमा पनि लिएका छौं । यसबारे अनुसन्धान भइरहेको छ ।’
खानतलासी लिएको गोदम रहेको घर मदन गुप्ताको रहेको र उक्त गोदमको सञ्चालकको नाम भने खुल्न नसकेको भन्दै उनले यसबारेमा अनुसन्धान भइरहेको बताए ।
यता आदर्शनगरका ट्रान्सपोर्ट व्यपारीहरुले भने व्यपारीलाई दुख दिने नियतले सशस्त्र प्रहरीले पटक पटक गोदमममा आएर छापा मार्ने र बिलबिजक भएकै सामानहरु उठाएर लिएर जाने गरेको आरोप लगाएका छन् । एक ट्रान्सपोर्ट व्यपारीले भने, सशस्त्र प्रहरीको यो रवैयाले हामी हैरान छौं । बिलबिजक देखाउँदा पनि बिनाकारण सशस्त्र प्रहरीले गोदामा फुटाएर सामान लिएर जान्छ । पछि राजश्व अनुसन्धान कार्यालयमा गएर हामीले सबै प्रमाण दिएपछि सफाई पाएर सामान फिर्ता लिएर आउँछौं ।
यदि छापा वा खानतलासी लिनै पर्ने भए प्रकृया पुरा गरेर लिनुपर्ने भन्दै उनले भने, गोदाममा खानतलासी गर्ने अधिकार सशस्त्र प्रहरीसंग छैन । त्यो अधिकार राजश्व अनुन्सधान कार्यालयसंग मात्रै छ । तर बारबार सशस्त्र प्रहरीले आएर गोदममा ताल्चा फुटाएर छापा मार्छ , बिलबिजक भएकै सामान उठाएर लैजान्छ । यो हर्कत हामीले कति दिनसम्म सहने ? त्यसैको परिणाम आजको घटना हुन पुग्यो ।