वीरगन्ज,१माघःवीरगन्जमा रहेको खाद्य व्यवस्था तथा व्यापार कम्पनी लिमिटेडको शाखाले यसवर्ष हालसम्म किसाननहरुबाट साढे ७ हजार क्विन्टल बढी धान खरिद गरेको छ ।
वीरगन्जस्थित खाद्य व्यवस्था तथा व्यापार कम्पनी लिमिटेडले पर्सा, बारा र रौतहटका किसानहरुको धान खरिद गर्दै आइरहेको छ ।
यो वर्ष शाखाले १० हजार क्विन्टल धान खरिदको कोटा पाएकोमा बुधबारसम्म ७ हजार ७ सय क्विन्टल धान खरिद गरिसकेको शाखा प्रमुख पंकज झाले जानकारी दिए ।
यस वर्षदेखि टोकन प्रणालीबाट किसानहरुबाट धान खरिद गर्न थालेको जानकारी गराउँदै झाले हरेक किसानलाई ४० क्विन्टल धान खरिद गर्ने दरले टोकन बाँडिएको बताए । अहिलेसम्म किसानलाई वितरण गरिएको २ सय ७५ टोकनमध्ये बुधबारसम्ममा २ सय ४ टोकनबाट धान खरिद भइसकेको उनले जानकारी दिए ।
टोकन लिएर गइसकेका किसानले धान बिक्री गर्न नल्याएमा पाएको धान खरिदको लक्ष्य पुरा गर्नका लागि बिक्री गर्न इच्कुछ अन्य किसानबाट धान खरिद गरिने उनले बताए ।
झाका अनुसार, यस वर्ष वीरगन्जस्थित शाखाले सोना मन्सुली धान मात्र खरिद गरिरहेको छ । सोना मन्सुली धानको समर्थन मूल्य संघीय सरकारले प्रतिक्विन्टल ३ हजार ६ सय २८ रुपैयाँ ३३ पैसा निर्धारण गरेको छ । त्यहि मूल्यमा धान खरिद गरिरहेको शाखा प्रमुख झाले जानकारी दिए ।शंकर आचार्य /कान्तिपुर