वीरगन्ज,५मंसिरःबाराका प्रमुख जिल्ला अधिकारी धर्मेन्द्रकुमार मिश्रले सिमरामा दुई दिन आन्दोलन गरेका जेनजीका प्रतिनिधिहरुसंग वार्ताको तयारी भइरहेको जनाएका छन् ।बिहीबार वार्तामा बोलाइएपछि प्रदर्शन स्थगित गरेका जेनजीका अगुवा र प्रतिनिधीहरुसंग स्थानीय प्रशासनले आज (शुक्रबार) वार्ता गर्न लागेको हो ।
वार्तामा सहभागी हुन संघीय सरकारका खेलकुदमन्त्री बब्लु गुप्ता, जेनजी अगुवा सुदन गुरुङपनि सिमरा आइसकेको जेनजी बाराका संयोजक सम्राट उपाध्यायले जानकारी दिए ।
आज दिउँसो १ः३० बजे मधेसखबरसंग टेलिफोनमा कुराकानी गर्दै बाराका प्रमुख जिल्ला अधिकारी मिश्रले वार्ताका लागि तयारी भइरहेको जानकारी गराए । उनले भने,‘वार्ताका लागि तयारी हुदैंछ ।जिल्ला प्रशासन कार्यालयमा वार्ता हुदैन । वार्ता हुने स्थल र समय तय भइसकेको छैन । त्यसैको लागि हामी अहिले छलफलमा जुटेका छौं ।
यता जेनजी बाराका संयोजक उपाध्यायले पनि स्थानीय प्रशासनसंग आजै वार्ता हुने जानकारी दिए । जनकपुरबाट आज सिमरा आइपुगेका मन्त्री गुप्ता र जेनजी अगुवा गुरुङले सिमराका जेनजीसंग छलफल गरिसकेपछि स्थानीय प्रशासनसंग वार्ता गर्न जाने उनले बताए ।
बुधबार एमाले नेता–कार्यकर्ताले केही जेनजी युवालाई कुटपिट गरेपछि चर्किएको विवादको कारण दुई दिन बाराको सिमरा अशान्त थियो । कफ्र्यू आदेशसमेत अवज्ञा गर्दै जेनजी युवाले बुधबार र बिहीबार दिनभर नै वीरगञ्ज–पथलैया सडकखण्डको सिमरा चोकमा टायर बालेर प्रदर्शन गरेका थिए ।