जनकपुरधाम,१६कात्तिक :धनुषाकाे बीरेन्द्र बजारमा बसले अटोलाई ठक्कर दिँदा एकै परिवारका तीन सदस्यसहित चार जनाको मृत्यु भएको छ । अन्य दुईजना बालबालिका गम्भीर घाइते भएका छन् ।
विराटनगरबाट धनगढी जाँदै गरेको सु.प्र ०१–००१ ख ३२८८ नम्बरको बसले विपरीत दिशाबाट आउँदै गरेको प्रदेश २–०१–००१ ह १२३० नम्बरको अटोलाई शनिबार साँझ ठक्कर दिएको थियो ।
पूर्वपश्चिम राजमार्ग अन्तर्गत धनुषाको गणेशमान चारनाथ नगरपालिका वडा नंबर १ वीरेन्द्र बजारमा भएको उक्त दुर्घटनामा गणेशमान चारनाथ नगरपालिका १ भरतपुरका अन्दाजी ४० वर्षीय धनबहादुर पुर्वछाने मगर, ३५ वर्षीय शम्भु पुर्वछाने मगर, ३५ वर्षीया निशा मगर र अन्दाजी ४० वर्षीय अटोरिक्सा चालक डम्बर राईको मृत्यु भएको हो ।
उनीहरुकाे घटनास्थलमै मृत्यु भएको प्रहरीले जनाएको छ ।
दुर्घटनामा १४ वर्षीय शीतल मगर र ८ वर्षीय राेशन मगर घाइते भएका छन्।उनिहरुकाे जनकपुरस्थित न्युराे अस्पतालमा उपचार भइरहेको छ।
बसका चालक लखिराम दनुवारलाई प्रहरीले नियन्त्रणमा लिएको छ।