रौतहट,५असोजः रौतहटमा प्रहरीले तरकारी बोक्ने गाडीबाट लागुऔषध गाँजा बरामद गरेको छ । प्रहरी चौकी रामपुरखापबाट गस्तीमा खटिएको प्रहरी टोलीले शनिबारराति इशनाथ नगरपालिका –८ मोतिपुर सडक खण्डबाट तरकारी बोकेको गाडीबाट ३ सय ३४ किलो गाँजा बरामद गरेको हो ।
मोतिपुरबाट काउली लोड गरेर जटहरा हुँदै भारततर्फ जाँदै गरेको प्रदेश ३–०१–०२२ च १८६१ नम्बरको पिकअप गाडीबाट प्रहरीले २६ वटा पोकामा रहेको गाँजा बरामद गरेको जिल्ला प्रहरी कार्यालय रौतहटका प्रवक्ता तथा प्रहरी नायब उपरीक्षक राजु कार्कीले जानकारी दिए ।
गस्तीमा रहेको प्रहरीलाई देख्ना साथ गाडी चालक गाडी छाडेर भागेपछि प्रहरीलाई शंका लागेर चेकजाँच गर्दा तरकारी भित्र लुकाएर राखिएको २६ वटा पोकामा ३ सय ३४ किलो लागुऔषध गाँजा भेटिएको कार्कीले बताए ।
गाँजा र गाडी प्रहरीले नियन्त्रणमा लिएको र फरार भएका गाडी चालक र गाँजा तस्करको खोजीकार्य भइरहेको कार्कीले बताए ।