वीरगन्ज,८भदौं :स्वास्थ्य कार्यालय पर्साले हालसम्म हैजा पुष्टि भएका बिरामीहरु वीरगन्ज महानगरपालिकाका मात्रै रहेको जनाएको छ । वीरगन्ज बाहेक जिल्लाका अन्य कुनैपनि पालिकामा अहिलेसम्म हैजाको बिरामी नभेटिएको स्वास्थ्य कार्यालय पर्साको भनाई छ ।जिल्लका अन्य पालिकामा झाडापखालाका बिरामीहरु भेटिएपनि उनिहरुमा हैजाको संक्रमण भने पुष्टि अहिलेसम्म नभएको स्वास्थ्य कार्यालय पर्साका जनस्वास्थ्य अधिकृत जयमोद ठाकुरले जानकारी दिए ।
आइतबार बिहान नेशनल मेडिकल कलेजमा परीक्षणका क्रममा हैजाको संक्रमण पुष्टि भएका १४ वर्षीय बालकको स्थायी घर बहुदरमाई नगरपालिका वडा नम्बर ५ मा रहेपनि उनि वीरगन्ज–१२ श्रीपुरस्थित नेपाल टेलिकम पछाडिको टोलमा डेरामा बस्दै आएको खुलेको स्वास्थ्य कार्यालय पर्साका जनस्वास्थ्य अधिकृत ठाकुरले जानकारी दिए । ती बालकसंगै डेरामा बस्दै आएका उनका काका र काकीमा पनि संक्रमण पुष्टि यसअघि नै भइसकेको र उनिहरुको भवानी अस्पतालमा उपचार चलिरहेको ठाकुरले बताए । त्यसका कारण बहुदरमाई नगरपालिकामा पनि हैजाको बिरामी भेटियो भनेर सामाजिक सञ्जालमा भ्रम छर्नु गलत भएको उनले बताए ।
ठाकुरका अनुसार, हालसम्म वीरगन्ज महानगरको वडा नम्बर ११,१२,१३ ,१४ र ३ मा गरी ४२ जनामा हैजाको संक्रमण पुष्टि भएको छ । शंकास्पद थप बिरामीको दिशाको नमूना परीक्षणका लागि प्रयोगशालामा पठाइएको र त्यसको रिपोर्ट आउन भने बाँकी रहेको उनले बताए ।