जनकपुरधाम,२९बैशाखः बिहे भोजमा खाजा खाँदा धनुषामा एक सय जनाभन्दा बढी बिरामी भएका छन् । धनुषाको मिथिला बिहारी नगरपालिका–८ ठेरा कचुरीका नरेश महराको छोरीको बिहेमा खाजा खाँदा जन्तीसहित १ सय जना भन्दा बढी बिरामी भएका हुन् ।
स्वास्थ्य कार्यालय धनुषाका प्रमुख उमेश यादवका अनुसार आइतबार राति जनकपुर उपमहानगरपालिका–२३ बिन्धीबाट मिथिला बिहारी नगरपालिका–८ ठेरा कचुरीमा जन्ती पुगेको थियो । स्वयम्बर सकिए लगतै खाजामा बुनियाँ, रसबरी लगायतका मिठाइ खुवाइएको थियो ।
खाजा खाएलगतै पेट दुख्ने, बान्ता हुने, कमजोर हुने क्रम चलेको घटनास्थलमा परिवारजन र बिरामीसँगको प्रतिक्रियापछि थाहा भएको प्रमुख यादवले जानकारी दिए ।४५ जना भन्दा बढी प्रादेशिक अस्पतालमा भर्ना भएको र अन्यको नजिकको क्लिनिक तथा अन्य अस्पतालमा उपचार भइरहेको प्रमुख यादवले बताए । केही भने उपचारपश्चात निको भएर घर समेत फर्किएका छन् ।
‘खाजामै प्वाइजन भएर बिरामी परेको हाम्रो अनुमान छ । घटनास्थल पुगेर हामीले खाजाको स्याम्पल ल्याएका छौं । ल्याबमा परीक्षण गरेर के कारणले भएको हो भन्ने पुष्टि हुन्छ,’ यादवले भने ।साभारः अनलाइनखबर