वीरगन्ज,८माघःपर्सामा सशस्त्र प्रहरीले ६ महिनामा २१ करोड भन्दा बढी मूल्यका सामान नियन्त्रणमा लिएर वीरगन्ज भन्सार कार्यालय र राजश्व अनुसन्धान कार्यालयमा बुझाएको छ ।
चालु आर्थिक वर्षको साउनदेखि पुसम्म भारतबाट भन्सार राजश्व छलेर पर्साको वीरगन्जसहितका नाका हुदैं भित्रयाइएका २१ करोड २८ लाख २६ हजार ५ सय २२ रुपैयाँ मूल्यका सामान नियन्त्रणमा लिइएको सशस्त्र प्रहरी बल नेपाल नम्बर १३ गण हेडक्वार्टर पर्साका सुचना अधिकारी सशस्त्र प्रहरी नायब उपरीक्षक नरेन्द्र सिंह धामीले जानकारी दिए ।
नियन्त्रणमा लिइएका ती सामान आवश्यक अनुसन्धान तथा कारबाहीका लागि वीरगन्ज भन्सार कार्यालय र बाराको पथलैयास्थित राजश्व अनुसन्धान कार्यालयमा बुझाइएको उनले बताए ।
पछिल्लो ६ महिनामा वीरगन्ज भन्सार कार्यालयमा १६ करोड ४७ लाख ४१ हजार १ सय ७५ रुपैंया बराबरको र ४ करोड ६० लाख ८५ हजार ३४७ रुपैंया मूल्य बराबरको सामान राजश्व अनुसन्धान कार्यालय पथलैयामा बुझाइएको धामीले जानकारी दिए ।
पर्सामा सशस्त्र प्रहरीले गत आर्थिक वर्ष २०८०/८१ मा (१२ महिनामा) भने पर्साका विभिन्न स्थानबाट राजश्व छली गरेर भित्रयाइएका १४ करोड ५९ लाख ७२ हजार ८६७ रुपैंया मूल्य बराबरको सामान बरामद गरेर भन्सार र राजश्व अनुसन्धान कार्यालयमा बुझाएको थियो । गत आर्थिक बर्षको तुलनामा चालू आर्थिक बर्षको ६ महिनामै ६ करोड ६८ लाख ५३ हजार ६५५ रुपैंया बढी मूल्यको सामान बरामद गरिएकोपनि उनले बताए ।
फाइल तस्बिर ।