वीरगन्ज,२३पुसःवीरगन्जस्थित मानव सेवा आश्रममा रहेका लक्ष्मीनारायण(आश्रीत)हरुको उपचारमा आवश्यक पर्ने औषधि स्वास्थ्य कार्यालय पर्साले सहयोग गरेको छ ।मानव सेवा आश्रमलाई स्वास्थ्य कार्यालय पर्साले ८४ हजार रुपैयाँ बराबरको ४१ प्रकारका औषधिहरु सहयोग गरेको हो ।
मंगलबार स्वास्थ्य कार्यालय पर्साका प्रमुख डाक्टर मुक्तिनारायण साहसहितको टोलीले आश्रममै पुगेर आश्रमका संस्थापक देवेश गुप्तालाई ती औषधि प्रदान गरेका हुन् ।
मानव सेवा आश्रम वीरगन्ज शाखामा हाल अभिभावकविहिन र बेसाहरा गरी ५५ जना आश्रीतहरु छन् ।मंगलबार उनिहरुलाई स्वास्थ्य कार्यालय पर्साका तर्फबाट कोभिड खोपको बुस्टर डोजपनि लगाइदिएको स्वास्थ्य कार्यालय पर्साका जनस्वास्थ्य अधिकृत जयमोद ठाकुरले जानकारी दिए ।
ठाकुरका अनुसार, आश्रममा रहेका आश्रीतहरुमध्ये कतिपयको मानसिक अवस्था ठिक नरहेको,बृद्धबृद्धाको स्वास्थ्यमा निरन्तर समस्या देखिने गरेकोले उपचारमा आवश्यक पर्ने प्राथमिक उपचारका औषधिका साथै मानसिक रोग,विभिन्न प्रकारका एन्टिबायोटिक,दुखाई कम गर्ने औषधि, आँखा र कानको औषधि गरी ४१ प्रकारका औषधि स्वास्थ्य कार्यालयले प्रदान गरेको हो ।
आश्रममा रहेका बेसहारा बृद्धबृद्धा,महिला,पुरुष र अभिभावकबिहीन बालबालिकाका लागि मानवीय सेवाको भावले कार्यालयका तर्फबाट औषधि सहयोग गरिएको स्वास्थ्य कार्यालय पर्साका प्रमुख डा. मुक्ति नारायण साहले बताए ।
आश्रमका संस्थापक गुप्ताले औषधि सहयोगका लागि स्वास्थ्य कार्यालयलाई धन्यवाद दिदैं सहयोगमा प्राप्त औषधिले आश्रममा रहेका लक्ष्मीनारायणहरुको उपचारमा सहजता हुने बताए ।आगामी दिनमा पनि यस्ता सहयोगको अपेक्षा आँफुहरुले गरेको उनले बताए ।
औषधि हस्तान्तरण कार्यक्रममा स्वास्थ्य कार्यालय पर्साका जनस्वास्थ्य अधिकृत जयमोद ठाकुर, मल्लिका श्रेष्ठ,वीरगन्ज महानगरपालिकाका स्वास्थ्यकर्मी रामबाबु यादव लगायतकाकोपनि उपस्थिती थियो ।