काठमाडौं,२२मंसिरःनेपाल पत्रकार महासंघको आसन्न निर्वाचनमा सत्तारुढ कांग्रेस एमालेनिकट पत्रकारहरुको प्यानलविरुद्ध अर्को गठबन्धन बनाएर उत्रिएका माओवादी केन्द्र निकट प्रेस सेन्टरले कांग्रेसको विद्रोही समूहलाई साथ दिने भएको छ ।
कांग्रेसनिकट प्रेस युनियनले एमालेनिकट प्रेस चौतारीसँग सहकार्य गरेपछि पार्टी सभापति शेरवहादुर देउवा पक्षधर मानिने हालका बरिष्ठ उपाध्यक्ष रमेश विष्टले अध्यक्षमा उम्मेदवारी दिएका छन् । उनलाई माओवादी केन्द्र,नेकपा एसलगायतका दलका संगठनहरुले समर्थन गरेका छन् ।
प्रेस चौतारी र प्रेस युनियनको पक्षबाट अध्यक्षमा निर्मला शर्माको उम्मेदवारी परेको छ । उता प्रेस युनियनका रमेश विष्टले अध्यक्षमा बागी उम्मेदवारी दिएपछि प्रेस सेन्टरका अध्यक्ष उम्मेदवार कमल गिरीलाई ‘ब्याक गराएर’ विष्टको नेतृत्वमा चुनावमा जान लागेको प्रेस संगठनका नेताहरुले बताएका छन् ।
‘श्रमजिवी पत्रकारहरुको साझा प्यानल’ नाम दिइएको उक्त विद्रोही प्यानलको अध्यक्षमा रमेश विष्ट छन् भने वरिष्ठ उपाध्यक्षमा माओवादीनिकट प्रेस सेन्टरबाट हालका महासचिव रोशन पुरीले उम्मेदवारी दिएका छन् ।
उक्त प्यानलको महिला उपाध्यक्षमा गंगा बराल,समावेशी उपाध्यक्षमा सुभास प्रसाद साह छन् । बराल माओवादीनिकट हुन् भने साह नेकपा एसनिकट समाजवादी प्रेस संगठनका हुन् ।
त्यस्तै महासचिवमा लेखनाथ न्यौपाने र खुला सचिवमा उत्तरसिंह विष्टको नाम सो समूहको सूचीमा राखिएको छ । महिला सचिव सरिता बराईली,एशोसियट सचिव विकास कार्की, दलित सचिव वसन्त विक,मधेशी सचिवमा श्रीजन झा र आदिवासी जनजाति सचिवमा भिष्ण राई तय भएका छन् । उक्त समूहको कोषाध्यक्ष उम्मेदवार रामकृष्ण अधिकारी र लेखा संयोजकमा धुर्व रावलको नाम तय भएको छ ।
रमेश विष्टको नेतृत्वमा कांग्रेसको विद्रोही पक्ष र माओवादीलगायत ६ वटा वामपन्थी पार्टीनिकट पत्रकारहरुका संगठनको संयुक्त प्यानलको घोषणा केहीबेरमा रिपोर्टर्स क्लवमा हुन लागेको छ ।