बारा,२८असोजःबारामा हात्तीको आक्रमणमा परी एक जनाको मृत्यु भएको छ। मृत्यु हुनेमा बाराको कोल्हवी नगरपालिका–२ मा घर भएका ६३ वर्षीय हस्तबहादुर ठोकर रहेका छन्।
सोमबार बिहान हात्तीले आक्रमण गर्दा उनको मृत्यु भएको जिल्ला प्रहरी कार्यालय बाराका प्रहरी प्रवक्ता प्रहरी नायब उपरीक्षक प्रकाश सापकोटाले जानकारी दिए। बिहान घाँस काट्न गाँउ नजिकको जंगलमा गएका ठोकरलाई हात्तीले आक्रमण गरेको थियो। बिहान अबेरसम्मपनि ठोकर घाँस लिएर घर नफर्केपछि परिवारका सदस्य र गाउँलेले जंगलमा खोज्न जाँदा ठोकर मृत भेटिएपछि प्रहरीलाई खबर गरेका थिए।
मृतक ठोकरको शव परीक्षणका लागि कलैयास्थित प्रादेशिक अस्पतालमा राखिएको प्रहरीले जनाएको छ। केहीदिन पहिले कोल्हवी नगरपालिका–२ मै एउटा हात्ती मृत अवस्थामा फेला परेको थियो। रासस