वीरगन्ज,१०साउनःवीरगन्जमा प्रहरीले झण्डै दुई करोड रुपैयाँ मुल्यको काजु, ज्वानो र इलेक्ट्रोनिक्स सामानसतिहको दुई वटा ट्रक नियन्त्रणमा लिएको छ ।
भारतबाट राजश्व छलेर ल्याइएको ती सामान तस्करीको रहेको आशंकामा प्रहरीले दुवै ट्रक वीरगन्ज महानगरपालिका वडा नम्बर २५ ड्राइपोर्ट चोकबाट बुधबार साँझ नियन्त्रणमा लिएको हो ।
जिल्ला प्रहरी कार्यालय पर्साका अनुसार, ना ५ ख २९१२ र ना ३ ख ७७२७ नम्बरको ट्रकबाट गरी १ करोड ८२ लाख ६ हजार ४३८ रुपैयाँ मूल्यको काजु, ज्वानो र इलेक्ट्रोनिक्स सामान बरामद गरिएको प्रहरी नायब उपरीक्षक दीपक भारतीले जानकारी दिए । ती सामान राजश्व छलीको रहेकाले सामानसहितका दुवै ट्रक नियन्त्रणमा लिएर आवश्यक अनुसन्धानका लागि राजश्व अनुसन्धान कार्यालय पथलैयामा पठाइएको उनले बताए ।