वीरगन्ज,३२जेष्ठःन्युजिल्यान्ड, जारी टी–२० विश्वकप क्रिकेटको समुह चरणबाटै बाहिरिएको छ । शुक्रबार बहिान भएको खेलमा पपुवा न्यु गिनीलाई हराउँदै अफगानिस्तानले सुपर– ८ मा स्थान पक्का गरेपछि न्युजिल्यान्ड समूह चरणबाटै बाहिरिएको हो । समूह ’सी’ बाट अफगानिस्तान र वेस्ट इन्डिज ३ खेलबाट समान ६ अंक बटुल्दै अर्को चरणमा प्रवेश गरिसकेका छन् ।
अफगानिस्तान र पपुवा न्यु गिनीको खेलमा अफगानिस्तान पराजित भएको भए न्युजिल्यान्ड अर्को चरणमा जाने झिनो आशा कायम हुन्थ्यो । अहिलेसम्म खेलेका दुवै खेल न्युजिल्यानले हार बेहोरेको छ । न्युजिल्यान्ड पहिलो खेलमा अफगानिस्तानसँग ८४ र दोस्रो खेलमा वेस्ट इन्डिजसँग १३ रनले पराजित भएको थियो ।
पहिलो खेलमा न्युजिल्यान्डलाई अफगानिस्तानले ७५ रनमै अलआउट गरिदिएको थियो । न्युजिल्यान्डले अब शनिबार युगान्डा र सोमबार पपुवा न्यु गिनीसँग खेल्नेछ । न्युजिल्यान्ड समूह ’सी’ को अंकतालिकाको पुछारमा रहेको छ । न्युजिल्यान्ड टी–२० विश्वकपको समूह चरणबाटै बाहिरिएको यो पहिलो पटक हो ।