वीरगन्ज,२८बैशाख:भारतमा जारी इन्डियन प्रिमियर लिग (आइपीएल) क्रिकेटमा शुक्रबार राति भएको को खेलमा गुजरात टाइटन्सले चेन्नई सुपर किंग्सलाई सहजै हराएको छ ।
गुजरातकाे घरेलु मैदान नरेन्द्र मोदी क्रिकेट स्टेडियम अहमदाबादमा भएको खेलमा गुजरातले चेन्नईलाई ३५ रनले हराएको हो ।
गुजरातले दिएको २ सय ३२ रनको लक्ष्य पछ्याएको चेन्नईले निर्धारित २० ओभरमा ८ विकेट गुमाएर १ सय ९६ रन मात्र बनाउँन सक्यो ।उसका लागि ड्यारियल मिचेल र मोईन अलिले अर्धशतकीय ईनिङ खेले । मिचेलले ३४ बलमा ७ चौका तथा ३ छक्काको सहयोगमा ६३ रन बनाए । अलिले ३६ बलमा ४ चौका र ४ छक्काको सहयोगमा ५६ रन बनाए ।महेन्द्रसिंह धोनीले ११ बलमा १ चौका र ३ छक्काको सहयोगमा अविजित २६ रन बनाए । शिभम दुबेले १३ बलमा २१ तथा रविन्द्र जडेजाले १० बलमा १८ रन बनाए ।
गुजरातका लागि मोहित शर्माले तीन तथा राशिद खानले दुई विकेट लिए । उमेश यादव र सन्दीप वारियरले समान एक एक विकेट लिए ।
त्यसअघि टस हारेर पहिले ब्याटिङ गरेको गुजरातले निर्धारित २० ओभरमा ३ विकेट गुमाई २ सय ३१ रन बनाएको थियो ।
गुजरातका लागि ओपनर शुभम गिल तथा साई सुदर्शन दुवैले शतक हाने। कप्तान गिलले ५५ बलमा ९ चौका र ६ छक्काको सहयोगमा १ सय ४ रनको शतकीय ईनिङ खेले । अर्का ओपनर सुदर्शनले ५१ बलमा ५ चौका र ७ छक्काको सहयोगमा १ सय ३ रनको शतकीय ईनिङ खेले ।
बलिङतर्फ चेन्नईका लागि तुसार देशपान्डेले २ विकेट लिए ।
१२ खेलमा पाँच जित निकालेको गुजरात अंक तालिकाको आठौं स्थानमा उक्लिएको छ । १२ खेलमा छैठौं हारका साथ चेन्नई चौथो स्थानमा कायमै छ । गुजरातको अघिल्लो चरणमा प्रवेशको सम्भावना बाँकी नै छ ।