काठमाडौं,१२पुष: काठमाडौंमा जारी प्रधानमन्त्री कप महिला राष्ट्रिय क्रिकेटमा मधेस प्रदेशले दोस्रो जीत हात पारेको छ ।
बिहीबार भएकाे खेलमा मधेसले लुम्बिनी प्रदेशलाई ८ विकेटले हराएकाे हाे । प्रतियोगितामा यो मधेसकाे दाेस्राे जीत हो ।
मूलपानी क्रिकेट मैदानमा भएकाे खेलमा जितका लागि पाएको ९७ रनको सामान्य लक्ष्य मधेसले १८.५ ओभरमा २ विकेट गुमाउँदै भेट्टायो ।
मधेसका लागि ओपनर ब्याटर पुजा महतोले सर्वाधिक ६० रन बनाइन् । उनले ५९ बलमा ५ चौका प्रहार गरिन् । अनुराधा चौधरीले १७ र सरस्वतीकुमारी चौधरी १२ रनमा अविजित रहिन् ।
बलिङतर्फ लुम्बिनीका लागि सरस्वती पुन र कमला जीएमले समान १/१ विकेट लिए ।
यसअघि टस जितेर पहिला ब्याटिङ गरेको लुम्बिनीले २० ओभरमा ७ विकेट गुमाउँदै ९६ रन बनाएको थियो ।
लुम्बिनीका लागि ओपनर ब्याटर लक्ष्मी चौधरीले ६४ रनको अविजित पारी खेलिन् । उनले ६४ बलमा ८ चौका र २ छक्का प्रहार गरिन् । सरस्वती जीएमले १० रन बनाइन् भने अन्य कुनैले पनि दोहोरो अंकमा रन बनाउन सकेनन् ।
मधेसका लागि साक्षी यादवले सर्वाधिक २ विकेट लिएइन् । पुजा महतो, आरती महतो र कविता गौतमले १/१ विकेट लिए ।
यो नतिजापछि मधेस र लुम्बिनीको समान ६ खेलबाट ४ अंक भएको छ । रनरेटमा लुम्बिनी पाँचौ र मधेस छैटौं स्थानमा छन् । यी दुवैको शीर्ष ४ मा पर्दै प्लेअफमा पुग्ने गणितीय संभावना कायमै छ ।