वीरगन्ज, २९ असोज : आउँदो तिहार तथा छठ पर्व अगाडी नै सिर्सिया नदी प्रदुषण नरोकिए सिलबन्दी गरेर उद्योगलाई कारबाही गर्ने निर्णय वीरगन्ज महानगरपालिकाले गरेको छ ।
वीरगन्ज महानगरपालिकामा सोमबार उद्योगी व्यवसायी, जिल्ला प्रशासन कार्यालय , जिल्ला प्रहरी कार्यालयका प्रतिनिधि बीच बसेको बैठकले उद्योगहरुबाट निस्कने रसायनयुक्त लेदो र पानी तथा फोहोरवस्तु प्रशोधन गरेर मात्रै नदीमा फाल्नुपर्ने र त्यसो गरेको नपाए सम्बन्धित उद्योगमा सील गरी नियम बमोजिम जरिबाना तिराउने निर्णय गरेको हो ।
वीरगन्ज महानगरपालिकाका मेयर राजेशमान सिंहले नदी प्रदुषण नगरे उद्योगमा सिलबन्दी गरेर कारबाही गर्ने निर्णय भएको बताए । यस्तो निर्णय भएपछि बैठकमा सहभागी उद्योगीहरुले सिर्सिया नदीमा भइरहेको प्रदुषण नियन्त्रणका लागि आवश्यक काम गर्न आफुहरु पनि तयार रहेको आश्वासन दिए ।
यसअघि सोमबारै बिहान महानगरपालिकाका मेयर सिंहको नेतृत्वको टोलीले सिर्सिया नदी प्रदुषणमा गर्नेमध्येका ६ वटा उद्योगहरुको स्थलगत अनुगमन गरेको थियो ।
विगतमा बारम्बार अनुगमन हुँदा समेत उद्योगीहरुले नदी प्रदुषण गर्ननछाडे पछि सोमबार बिहान मेयर सिंह आफै अनुगमनमा निस्किएका थिए । अनुगमनपछि सोमबार दिउँसो मेयर सिंहले नदी प्रदुषण गराउने उद्योगका संचालकहरुलाई महानगरपालिका कार्याालयमा बोलाएर नदी प्रदुषण रोक्न चेतावनीसहितको निर्देशन दिए ।
बैठकले वीरगंज महानगरभित्र सन्चालित हरेक उद्योगले ६/६ महिनामा स्व–अनुगमन मुल्यांकन प्रतिबेदन महानगरमा बुझाउनु पर्ने निर्णय पनि गरेको छ ।
यस्तै उद्योगीहरुले सिर्सिया नदीमा प्रदुषण गर्न नरोके वीरगन्ज महानगरपालिका र वातावरण संरक्षण ऐन २०७७ तथा वातावरण नियमावलीले तोके बमोजिमको कारबाही प्रकृया अघि बढाउने निर्णयपनि बैठकमा भएको मेयर सिंहले जानकारी गराए ।
बैठकमा मेयर सिंहले वीरगन्जकै लाइफलाइनको रुपमा रहेको सिर्सिया नदी प्रदुषण उद्योगीहरुले गरिरहेको भन्दै अब प्रदुषण गरेको भेटिए ठाउँको ठाउँ कारबाही गर्ने गरि संयन्त्र तयार पार्ने पनि बताए ।
बैठकमा सिर्सिया नदी प्रदुषण गर्ने उद्योगमध्येका श्री सिद्धि टेक्सटायल्स, अरनिको प्रोसेसिङ, पाना पेपर्स, न्यू पशुपति इन्डस्ट्रिज, मरियम लेदर्स र ग्लोबल लेदर्सका संचालकले आफूहरु उद्योगबाट निस्कने फोहोर पानी प्रशोधन गरेर मात्रै नदीमा मिसाउन तयार रहेको बताए । महानगरले नदी प्रदुषण नियन्त्रणका लागि गरिरहेको काम सह्रानीय रहेको भन्दै उद्योगीहरुले आफूहरु पनि उद्योगमा पानी प्रशोधन केन्द्र राख्न र बोरिङबाट सफा पानी नदीमा हाल्ने व्यवस्था मिलाउन तयार रहेको बताए ।
बंठकमा अरनिको प्रोसेसिङ उद्योगका सोचन प्रसाद यादव, ग्लोबल लेदरका सरोज चौरसिया, सिद्धि टेक्सटायल्स र न्यु पशुपति इण्डस्टिजका अशोक मित्तल, मरियम लेदरका बालमुकुन्द चौधरी, पाना पेपर्स वकर्सका सुभाष पटेल लगायतको सहभागिता रहेको थियो ।महानगरपालिकाले यसअघि सिर्सिया नदी प्रदुषण गरेका ५ वटा उद्योगलाई गत चैत दोश्रो साता ३÷३ लाख रुपैयाँ जरिबाना गरेको थियो ।
बाराको रामवनबाट सुरु भई पर्साको वीरगन्ज महानगर हुदैं सीमावर्ती भारतको रक्सौल सम्म बगेकाो सिर्सिया नदी विगत तीन दशकदेखि प्रदुषण र अतिक्रमणको चपेटामा पर्दै आएको छ । नदीलाई प्रदुषाणमुक्त गर्न माग गर्दै वातवरण र पर्यावरणप्रेमी तथा सामाजिक अभियन्ताहरुले विगत एक दशकदेखि दबाबमुलक कार्यक्रम गर्दै आइरहेको भएपनि नदीको प्रदुषण हाल सम्म रोकिएको छैन ।