बारा,२६असाेज: बाराको जितपुरसिमरा उपमहानगरपालिकाले पुर्व मेयर डा. कृष्णा प्रसाद पौडेलको निधनमा शोक मनाउन आज शुक्रबार सार्वजनिक बिदा दिएको छ ।
जितपुरसिमरा उपमहानगरपालिकाका प्रथम मेयरसमेत रहेका पौडेल बिहीबार आफ्नै घरमा मृत भेटिएका थिए ।
उपमहानगरपालिकाका मेयर राजन पौडेलले शुक्रबार बिहान एउटा सूचना जारी गर्दै पौडेलको निधनमा शोक मनाउन शुक्रबार बिदा दिने निर्णय भएको जनाएका छन् ।
उपमहानगरपालिकाअन्तर्गतका सम्पूर्ण वडा कार्यालय र शिक्षण संस्थाहरूमा शुक्रवार शोक बिदा दिने निर्णय भएको पौडेलद्वारा जारी सूचनामा लेखिएको छ ।
पौडेलको निधन प्रति दुःख व्यक्त गर्दै मेयर पौडेलले उपमहानगरपालिकालाई अपूरणीय क्षति भएको बताएका छन् ।
नेकपा एमालेको मधेस प्रदेश सचिवसमेत रहेका पौडेल बिहीबार साँझ आफ्नै घरको सुत्ने कोठामा घोप्टो परेको अवस्थामा मृत भेटिएका थिए । घरमा एक्लै भएको बेला पौडेल मृत भेटिएपछि पुगेको प्रहरीले उनको शवलाई पोस्टमार्टमका लागि वीरगन्जस्थित नारायणी अस्पतालमा ल्याइएको छ ।
पोस्टमार्टमको रिपोर्ट आएपछि मात्र पौडेलको मृत्युको कारण खुल्ने बारा प्रहरीका प्रवक्ता एवम् प्रहरी नायव उपरीक्षक दधिराम न्यौपानेले बताए ।