वीरगन्ज,२१असोजःपर्साको सखुवा प्रसौनी गाँउपालिकाको वडा नंम्बर २ श्रीपुरमा शनिबार आयोजित निःशुल्क आँखा जाँच शिविरमा ४ सय ४५ जनाको आँखा परीक्षण गरिएको । शिविरमा आँखा परिक्षण गरिएका मध्ये १ सय ५८ जनामा मोतियाबिन्दुको समस्या देखिएको छ ।
नेपाल नेत्रज्योति संघ आर.एम केडिया आँखा अस्पतालको प्राविधिक र छिमेक लघुवित्त वित्तीय संस्था लिमिटेडको आर्थिक सहयोगमा सखुवा प्रसौनी गाँउपालिका २ श्रीपुरमा एकदिने निःशुल्क आँखा जाँच तथा शल्यक्रिया शिविर आयोजना गरिएको थियो ।
मोतियाबिन्दु देखिएका सबै बिरामीहरुको नेपाल नेत्रज्योति संघ आर.एम केडिया आँखा अस्पतालमा निःशुल्य शल्यक्रिया गरिने बताइएकोछ । आर्थिक अभाव र पहुँचको अभावमा कोही पनि नागरिक आँखा उपचार सेवाबाट बञ्चित नहुन् भन्ने उद्देश्यले नेत्रज्योति संघले विभिन्न स्वदेशी तथा दातृ निकायहरुसँगको सहकार्यमा देशैभरि निःशुल्क आँखा शिविर सञ्चालन गर्दै आइरहेको छ ।
संघले हाल देशभरमा २७ वटा आँखा अस्पताल, १५० भन्दा बढी आँखा उपचार केन्द्र तथा ४४ वटा जिल्ला शाखाहरुमार्फत नेपाली नागरिकहरुलाई सस्तो मूल्यमा गुणस्तरीय आँखा उपचार सेवा प्रवाह गरिरहेको जनाएको छ ।
स्थापनादेखि हालसम्म संघले आफ्ना अस्पताल, उपचार केन्द्र तथा विभिन्न बाह्य कार्यक्रमहरु मार्फत नेपाली नागरिक तथा अन्य विभिन्न देशका नागरिक गरी कूल ४ करोड २ लाख ८६ हजार ५ जना आँखाका बिरामीहरुलाई आँखा उपचार सेवा र ४८ लाख ६७ हजार ७७४ जनाको आँखाको शल्यक्रिया गरिसकेको जनाएको छ ।