मधेसखबर
वीरगन्ज, १६ कार्तिक : पर्सा निर्वाचन क्षेत्र नम्बर १ को (ख)का प्रदेशसभा सदस्यका उम्मेदवार ओमप्रकाश सर्राफले भ्रष्टचारको अन्त्य गर्दै युवालाई स्वरोजगार बनाउने आफनो मुख्य एजेण्डा रहेको बताएका छन् ।
बुधबार वीरगन्ज महानगरपालिका वडा नम्बर ८ पानीटंकीमा चुनावी घरदैलोका क्रममा मतदातासंग साक्षात्कार गर्दै सर्राफले भने ,‘ मैले जिते भने हरेक बर्ष यस क्षेत्र अन्तर्गतका एक हजार युवाहरुलाई सिपमूलक तालिम प्रदान गरि रोजगारी दिलाउनेछु । लौरो चुनाव चिन्ह लिएर चुनाव लडेका सर्राफले आफुले अहिले गरेको वाचा अनुसारको काम नगरे जनताले दिने सजाय भोग्न पनि तयार रहेको वताए ।
उनले मुख्यमन्त्री लालबाबु राउतले यस क्षेत्रमा कुनै पनि नमूना काम नगरेकाले जनताले विकल्प खोजिरहेको भन्दै जनताको भरोसा माथि आफु खरो रुपमा उत्रने जिकिर पनि गरे । उनले भने ,‘ यहि क्षेत्रबाट जितेका मुख्यमन्त्रीले एउटा पनि नमूना काम गरेनन् , जे जति काम गरे त्यसमा भ्रष्टचार मात्रै गरियो , दुइ चार जना आसेपासेले मात्रै कमाए , त्यसका कारण यसपालि यहाका जनताले स्वच्छ छविका व्याक्ति खोजिरहेका छन् ।
सर्राफले अबका जनता पैसा र झुठा आश्वासनमा नबिक्ने भएकाले यो क्षेत्रले नयाँ अनुहारलाई रोज्ने निश्चित रहेको बताए ।
घरदैलो कार्यक्रममा हाम्रो नेपाली पार्टीकी समानुपातिक उम्मेदवार गुड्डी जोशी लगायतको पनि सहभागिता थियो ।