मधेसखबर
वीरगन्ज, १४ साउन : राष्ट्रिय प्रजातन्त्र पार्टी (राप्रपा) ले संघीयता खारेजीको माग गर्दै पोखरामा शनिबार विरोध प्रदर्शन गरेको छ ।
नागरिकता विधेयक, एमसीसी र संघीयता खारेजी लगायत २२ बुँदे माग राख्दै राप्रपाले पृथ्वी चोकमा १० मिनेट चक्काजाम समेत गरेको थियो ।
यसअघि प्रधानमन्त्री शेरबहादुर देउवालाई बुझाएको २२ बुँदे माग लागू नभएको र त्यसकै लागि पुनः सडकमा उत्रनु परेको राप्रपा कास्कीका प्रवक्ता अरुण गिरीले जानकारी दिए । ‘हामीले उठाएका माग सरकारलाई बुझाउन र दबाव दिन सांकेतिक रुपमा चक्काजाम गरेका हौं’, उनले भने ।
चक्काजामअघि आयोजित कोणसभामा बोल्दै राप्रपाको गण्डकी प्रदेश अध्यक्ष पञ्चराम गुरुङले नागरिकता विधेयक खारेज नभए नेपालको राष्ट्रियतामा खतरा पर्ने दाबी गरे ।
राप्रपाले असार १ गते महंगी नियन्त्रण, किसानलाई समयमै मल, राष्ट्रियताको संरक्षण, संघीयता खारेजी लगायत माग राखेर प्रधानमन्त्री शेरबहादुर देउवालाई ज्ञापन पत्र बुझाएको थियो । उक्त ज्ञापनपत्र बेवास्ता गरेको भन्दै रापप्राले यसअघि असार १७ गते देशैभरि मशाल जुलुस समेत गरेको थियो ।