मधेसखबर
वीरगंज ,०२ साउन : साउन महिनाभरीको हरेक सोमबार नारीहरु शिवजीलाई प्रशन्न बनाउन पानी समेत नखाई व्रत बस्ने गर्दछन् ।प्रेम, वर्षा र झरीको संगम साउन महिना धार्मिक हिसाबले पनि हिन्दु नारीहरुको लागि महत्वको महिना मानिन्छ ।
भने हरियो उपचारको रंग पनि हो, जुन मुटुसँग जोडिएको हुन्छ । उच्च रक्तचापको समस्याका लागि पनि हरियो राम्रो मानिन्छ ।साउन महिना सुरु भएसँगै अधिकांश महिलाहरुले माछा मासु, लसुन, प्याज नखाई व्रत बस्ने गर्छन् ।
योसंगै साउन महिना शुरु भएसंगै विभिन्न कस्मेटिक पसल, चुरा पसल , मेहेन्दी, हरियो ,रातो तथा पहेलो चुरा खरीद गर्ने र लगाउनेको भिड लाग्ने गरेको छ ।
बालिका, युवती, वयस्क विवाहित हुन या अविवाहित, हरियो पहेँलो वस्त्र, हरियो पहेलो चुरा, हरियो पहेँलो पोते, हत्केलामा मेहन्दी र त्यस्ता पहिरनमा सबै युवतीहरुको आकर्षण देखिन्छ । विवाहित महिला सौभाग्यको प्रतिकको रुपमा हरियो चुरा लगाउँछन भने अविवाहित युवती पनि आर्कषण र रमाईलोको लागि हरियो चुरा, हरिया पहिरन र मेंहन्दी लगाउँने गरेको बताउछन् ।
यो महिला ब्रत बस्नाले विवाहित नारीले आफ्नो श्रीमानको दीर्घायुको कामना र अविबाहित नारीले असल श्रीमान प्राप्त गर्ने धार्मिक विश्वास पनि रही आएको छ ।साउनमा हरियो चुराका साथै रातो र पहेँलो चुरा र पोते, मेहेन्दीको पनि प्रशस्तै माग भएको व्यापारीहरु बताउँछन् ।
यो महिना चुरा पसलहरुमा मात्र नभई फुटपाथ, मन्दिर प्रांगणमा समेत बेच्न राखिएको चुरा , मेहेन्दी , कस्मेटीक तथा श्रीगांरको सामाग्री पसलमा उत्तीकै भिडभाड पाउने गरीन्छ ।
महिलाको हातमा असारको अन्तिम सातादेखि नै हरियो तथा पहेँलो चुरा खन्किन थालेको छ । महिलाको आस्थालाई सम्मान गर्दै विभिन्न कार्यालयले पनि आफ्ना महिला कर्मचारीलाई हरियो चुरा तथा नङपालिस दिने गरेको पाइन्छ ।
यस्तो प्रचलन पछिल्लो समय झनै बढेर गएको छ ।यसको धार्मिक आस्था बुझेरभन्दा पनि फेसनका निम्ति लगाउने युवतीहरू पनि त्यत्तिकै छन्।
सामान्य अवस्थामा चुराको माग ठिकै भएपनि साउन, तीज र दशैंका बेला अत्याधिक हुने गरेको छ ।
बजारमा काँचका, प्लाष्टिकका, धातुका विभिन्न डिजाईनका आकर्षक चुराहरु पाइन्छन् । पहिले पहिले काँचका चुराहरुको प्रचलन बढी रहेको थियो भने अहिले प्लाष्टिक र मेटलका चुराहरुको पनि माग बढेको व्यापारीहरुको अनुभव छ ।
बजारमा अहिले सामान्य काँचको चुराको, चुराको बुट्टा र काँचको गुणस्तरको आधारमा प्रति दर्जन ६० रुपैयाँ देखि २ सय ५० रुपैयाँसम्म पर्ने गरेको छ । त्यस्तै प्लाष्टिक र मेटलका चुराहरु भने तुलनात्मक रुपमा महंगो हुने व्यापारीहरु बताउँछन् ।
गत वर्ष कोरोना माहामारीका कारण थला परेको व्यवसाय गत वर्षको तुलनामा यो वर्ष चुराको मूल्यमा दोब्बर वृद्धि पनि भएको र विक्री पनि राम्रो भईरहेको वीरगंज माईस्थानका व्यवपारीहरु संजय कुमार बताउँछन् ।