मधेसखबर
वीरगन्ज,३० असार : नवनियुक्त वन तथा वातावरण मन्त्री प्रदीप यादवले औद्योगिक नगरी वीरगन्जलाइ हराभरा शहरका रुपमा विकास गर्न आफु प्रतिबद्ध रहेको बताएका छन् ।
वीरगन्ज उद्योग वाणिज्य संघले बिहीबार आयोजना गरेको स्वागत तथा सम्मान कार्यक्रमलाइ सम्बोधन गर्दै मन्त्री यादवले भने ,‘ वीरगन्जलाई उद्योग र व्यापारको नगरिको पहिचान सहित एउटा हराभरा शहरको रूपमा विकास गर्न म प्रतिबद्ध छु । त्यसका लागि वीरगन्ज महानगरपालिका र वीरगन्जका उद्योगी व्यपारीसंग आवश्यक समन्वय गर्न वन तथा वातावरण मन्त्रालय तयार रहेको उनले बताए ।
वीरगन्जसंग प्रत्यक्ष सरोकार राख्ने निजगढ अन्र्तराष्ट्रिय विमानस्थल र फास्ट ट्रयाकको निर्माण तथा पर्सा राष्ट्रिय निकुन्जको विकास र प्रवर्द्धनका लागि पनि आफ्नो मन्त्रालयबाट हुने कामहरू द्रुतगतिमा अगाडि बढाइने उनले बताए ।
वनमन्त्री यादवले भने ,‘हुन त वन मन्त्रालय ताली भन्दा पनि बढी गाली खाने मन्त्रालय हो तर म आफनो छोटो कार्यकालमै यस्ता कामहरु गर्छु कि भोलीका दिनमा वनमन्त्रीको नाम आउदा जनताले गाली होइन ताली बजाउनेछन् ।
वनक्षेत्रमा राजनीतिक संरक्षणमा चलिरहेका अवैध क्रसर उद्योगलाई बन्द गरेर त्यसका सन्चालकहरुलाइ कानुनी कारबाहीको दायरा भित्र ल्याउने चेतावनी पनि उनले दिए ।चुरे क्षेत्र र मधेस एक अर्काको परिपूरक रहेको भन्दै उनले भने ,‘ चुरे बाचे मात्र मधेस जोगिन्छ चुरे नाश भए मधेस पनि मरुभूमीकरण हुन्छ , त्यसैले चुरे क्षेत्रको संरक्षण पनि मेरो मुख्य प्राथमिकतामा रहनेछ ।
वीरगन्ज उद्योग वाणिज्य संघका अध्यक्ष डाक्टर सुबोध गुप्ताको अध्यक्षतामा भएको कार्यक्रममा मधेस प्रदेशका उर्जा तथा खानेपानी मन्त्री ओमप्रकाश शर्मा, वीरगन्ज महानगरपालिकाका मेयर राजेशमान सिंह , संघका पुर्व अध्यक्ष गोपाल केडिया , उद्योगपतिहरु गणेश लाठ , अशोक टेमानी लगायतको पनि सहभागीता थियो ।