मधेसखबर
वीरगन्ज,२१जेठः वीरगन्जको नारायणी अस्पतालमा पाच दिन देखि भर्ना रहेका दलित दम्पतिको उपचारका लागि वीरगन्ज महानगरका मेयर राजेशमान सिंहले आर्थिक सहयोग गरेका छन् ।
अस्पतालमा भर्ना भएपनि पैसाको अभावमा उपचारको पर्खाइमा रहेका ७३ वर्षिय बच्चा महरा र उनकी श्रीमति ७० वर्षिया छठिया देवी महराका बारेमा खबर पाएपछि शनिबार बिहान आफै अस्पतालमा पुगेर मेयर सिंहले आर्थिक सहयोग गरेका हुन् ।
पर्साको पर्सागढी नगरपालिका ५ जिङ्गनाका ७३ वर्षीय बच्चा महरा र उनकी श्रीमति ७० वर्षीया छठिया दुवै उपचारको पर्खाइमा रहेको खबर विभिन्न सन्चार माध्यमबाट शुक्रबार सार्वजनिक भएको थियो । त्यो खबर पाएर शनिबार मेयर सिंह अस्पतालमा पुगेका थिए । बृद्ध दम्पत्तीको स्वास्थ्य अवस्था बारे बुझ्दै सिंहले उपचारका लागि आर्थिक सहयोग गर्नुका साथै पोषिलो आहारका लागि व्यवस्था पनि मिलाइ दिएका छन् । सिंहले ती बृद्ध दम्पत्तीको औषधी उपचारमा कुनै कमी नगर्न चिकित्सकहरुलाई निर्देशन दिँदै कुनै समस्या भए आफूलाई सिधै खबर गरेर जानकारी गराउन पनि आग्रह गरे ।
७३ वर्षिया महराको फागुनमा पक्षाघात भएपछि शरीरको आधा भाग शिथिल बनेको छ । दाहिने खुट्टामा आएको घाउ बल्झिँदै गएर पाकेपछि श्रीमति छठियाले पतिलाई गत मङगलवार उपचारार्थ अस्पताल भर्ना गर्न ल्याइन् । निःसन्तान महरा दम्पतीको सम्पत्तिको नाममा २ धुर जग्गामा बनेको एउटा छाप्रो मात्र छ । उमेरमा ज्याला मजदुरी गरेर पेट पालेको महरा दम्पतीको अहिले अशक्त भएपछि वृद्ध भत्ताले मात्रै भरथेग भइरहेको छ । त्यतिले खान–लाउन मुस्किलले पुगिरहेको छ ।
छठियाले पतिको खुट्टाको घाउमा कीरा परेपछि आफू सरकारी अस्पताल खोज्दै उपचारका लागि यहाँ आएको बताइन् ।आफु पनि अशक्त भइसकेको र दुवै खुट्टा सुन्निएकाले हिँडडुल गर्न गा¥हो भइरहेको उनले बताइन् । सन्तान नभएकाले बुढेसकालमा आफूहरूको रेखदेख तथा स्याहारसुसार गर्ने र औषधिमुलो गरिदिने पनि कोही नभएर निकै दुःख पाएको उनले बताइन् ।
अस्पतालको सर्जिकल वार्डका इन्चार्ज अहेव श्याम चौधरीले बच्चाको खुट्टाको घाउमा लागेका कीरा औषधि हालेर हटाइएको बताए । प्यारालिइसिसका कारण खुट्टाको नसा सुकेर रक्तसञ्चार हुन नसकेको भन्दै उनले घाउ निको हुन महिनौं दिन पनि लाग्न सक्ने बताए ।
कुरुवा बसेकी पत्नी छठियाको स्वास्थ्य अवस्था पनि कमजोर रहेको र उनको पनि स्वास्थ्य परीक्षणपछि आवश्यक उपचार गर्ने चौधरीले बताए ।