मोटरसाइकलको ठक्करबाट घाइते भएका बृद्धको उपचारका क्रममा मृत्यु

माधुरी महत्तो
वीरगन्ज, १८ बैशाख ः बाराको सिमरामा गत सोमबार भएको सवारी दुर्घटनामा गम्भिर घाइते भएका एक वृद्धको उपचारका क्रममा शनिबार मृत्यु भएको छ ।
मृत्यु हुनेमा बाराको जितपुर सिमरा उपमहानगरपालिका वडा नम्बर ३ सिमराका ७० वर्षिय विन्देश्वर महत्तो रहेका छन् ।
गत सोमबार सिमरा स्थित इच्छा होटल जाने बाटोको चोकमा सिमराबाट जितपुर तर्फ जादै गरेको ना.२.त.१७९७ नम्बरको ट्याक्टर, ना.५२.१७११ नम्बरको मोटरसाइकलमा ठोक्किएपछि उक्त मोटरसाइकलले पैदलयात्री महत्तोलाइ ठक्कर दिएको थियो ।
मोटरसाइकलको ठक्करबाट टाउकोमा गम्भिर चोट लागेका महत्तोलाइ शुरुमा सिमराको अल्पाईन अस्पतालमा उपचार गरि थप उपचारको लागी वीरगन्ज स्थित स्पर्श मल्टिस्पेशीलिटी हस्पिटलमा ल्याएर भर्ना गरिएको थियो । त्यहि अस्पतालमा उपचारका क्रममा शनिबार अपरान्ह ३ बजे महत्तोको मृत्यु भएको प्रहरीले जानकारी दिएको छ ।
सोमबारको दुर्घटनामा मोटरसाइकल चालक जितपुर सिमरा ३ का ३४ वर्षिय राजन भण्डारी र उनकी पत्नि २९ वर्षिय सम्झना पाण्डे सामान्य घाइते भएका थिए ।