काठमाडौं,१९चैत : राष्ट्रिय स्वतन्त्र पार्टीका सभापति रवि लामिछानेले नेकपा एमालेका अध्यक्ष केपी शर्मा ओली र नेपाली कांग्रेसका नेता रमेश लेखकलाई पक्राउ गरिएपछि आएको विरोधबारे बोलेका छन् ।
प्रतिनिधिसभाको पहिलो बैठकलाई बिहीबार सिंहदरबारमा सम्बोधन गर्दै उनले भदौ २३ र २४ गतेको जेन–जी आन्दोलनमा ज्यान गुमाएकालाई स्मरणसहित न्यायको विषय बुझ्न भने।‘न्याय पाउने पहिलो हक सहिदकी आमाको हो, यसलाई प्रतिशोधन भन्न पाइने छैन,’ रविले भने ।
एमाले सांसद गुरू बरालले ओली र लेखकलाई रिहा गर्न माग गरेपछि लामिछानेले यस्तो प्रतिक्रिया दिएका हुन् ।उनले विधि र प्रक्रियाको पालना गर्न विपक्षी दलहरूलाई आग्रह गरे। सत्ता परिवर्तनपछि ‘विदेशी चलखेल’ भन्ने पुरानो आरोप दोहोरिन नदिने पनि उनले बचन दिए ।
‘सत्ता छाड्नु परेपछि विदेशी चलखेल भन्ने खेल अब हुने छैन। पारदर्शी परराष्ट्र नीति अवलम्बन गरिनेछ । हाम्रो सरकारले राष्ट्रिय हितलाई प्राथमिकता दिनेछ,’ उनले अगाडि भने ।