वीरगन्ज,१७चैत: जिल्ला प्रशासन कार्यालय पर्सामा सेवाग्राहीले भोग्दै आएका झन्झट र प्रशासनिक अड्चनलाई हटाउन नवनिर्वाचित सांसदहरुले चासो देखाएका छन्।पर्सा-१ का सांसद हरि पन्त र पर्सा-२ का सांसद सुशील साह कानुले जिल्ला प्रशासन कार्यालय पर्सामा संगै पुगेर अनुगमन गरी कार्यालयको सेवा प्रवाहबारे विस्तृत जानकारी लिएका छन्।
अनुगमनका क्रममा सांसदद्वयले कार्यालयमा सेवा लिन आएका सर्वसाधारणसँग पनि प्रत्यक्ष संवाद गरे।धेरैजसो सेवाग्राहीले एउटै फाइलमा ‘तोक’ लगाउन र स्वीकृत गराउन विभिन्न कोठाहरू धाउनुपर्ने, साना कामका लागि पनि घन्टौँ कुर्नुपर्ने र प्रशासनिक प्रक्रिया झन्झटिलो रहेको गुनासो पोखेका थिए।
त्यसपछि सांसदद्वयले प्रमुख जिल्ला अधिकारी (प्रजिअ) भाेला दाहालसंग भेटेर कार्यालयकाे सेवा प्रवाह सुधारका उपायहरूबारे छलफल गरे।त्यसक्रममा प्रमुख जिल्ला अधिकारी दाहालले सेवालाई प्रविधिमैत्री र सरलीकृत बनाउन चालिएका कदमहरूबारे जानकारी गराए। प्रजिअ दाहालले कार्यालयको कार्यसम्पादनलाई चुस्त बनाउन र बिचौलियामुक्त बनाउन ‘एकद्वार प्रणाली’ को अवधारणा अघि सारिएको बताए।
सांसदद्वय पन्त र साहले सरकारी अड्डामा जनताले सास्ती पाउनु लोकतन्त्रको उपहास भएको बताए। उनिहरुले भने, “हाम्रो मुख्य उद्देश्य भनेकै आम नागरिकले राज्यबाट पाउने सेवा सहज र सम्मानजनक ढंगले पाउनु पर्छ भन्ने हो। प्रजिअले सुरु गर्नुभएको सुधारका कार्यहरूले जनताको चाहना पूरा गर्ने र समयको बचत हुनेमा हामी आशावादी छौँ।”