वीरगन्ज,६चैत:पर्साको सखुवाप्रसौनी गाउँपालिका–१ अवस्थित मधुवन मथवल क्षेत्रको कोइलाभर जंगल छेउमा“कोईलाभार जंगल रिसोर्ट” औपचारिक रूपमा सञ्चालनमा आएको छ । उक्त रिसाेर्टकाे शुक्रबार पर्सा क्षेत्र नम्बर २ का प्रतिनिधि सभा सदस्य सुशील कुमार कानुले उद्घाटन गरेका हुन् ।
उद्घाटन कार्यक्रमलाई सम्बोधन गर्दै सांसद कानुले यस्तो किसिमका रिसोर्टहरूले स्थानीयस्तरमा रोजगारी सिर्जना गर्ने र ग्रामीण भेगको मौलिक स्वादमा रमाउन सक्ने अवसर प्रदान गर्ने बताए । उनले यस्ता संरचनाले ग्रामीण क्षेत्रलाई वीरगन्जसँग जोड्ने सेतुको रूपमा काम गर्ने उल्लेख गरे ।
करिब एक बिघा क्षेत्रफलमा फैलिएको उक्त रिसोर्ट निर्माणमा करिब एक करोड रुपैयाँ लगानी गरिएको सञ्चालक सुनिल पटेलले जानकारी दिए । उनले रिसोर्टले वीरगन्ज र कोईलाभार क्षेत्रबीच पर्यटनको सेतुको रूपमा काम गर्ने विश्वास व्यक्त गरे ।
रिसोर्टमा पारिवारिक बसाइका लागि उपयुक्त आधुनिक तथा स्तरीय कोठाहरू, स्विमिङ पुल, तथा ‘लाईभ फिसिङ’ को विशेष व्यवस्था गरिएको छ । साथै, परम्परागत स्वादलाई प्राथमिकता दिँदै दाउराबाट पकवान र सिलौटाबाट मसला पिसेर तयार गरिएका स्थानीय परिकारहरू समेत उपलब्ध गराइने व्यवस्था गरिएको सञ्चालकले पटेलले बताए ।