मधेसखबर
वीरगन्ज,१५जेठः प्रधानमन्त्री शेरबहादुर देउवाले बाराको निजगढमा निर्माण गर्ने भनिएको अन्तर्राष्ट्रिय विमानस्थल बारे सर्वोच्च अदालतले दिएको फैसलाको अध्ययन गरेर सरकारले आवश्यक निर्णय लिने बताएका छन् ।
प्रतिनिधिसभाको शनिबारको बैठकमा सरकारको आगामी आर्थिक वर्षको नीति तथा कार्यक्रममाथि उठाएका प्रश्नको जवाफ दिने क्रममा प्रधानमन्त्री देउवाले उक्त कुरा बताएका हुन् ।देउवाले भने ,‘निजगढ अन्तर्राष्ट्रिय विमानस्थलको सम्बन्धमा सर्वोच्च अदालतको फैसलाको अध्ययन गरी आवश्यक निर्णय लिइनेछ’ ।
सर्वोच्च अदालतले बिहीबार निजगढमा अन्तर्राष्ट्रिय विमानस्थल निर्माण नगर्न फैसला दिएको थियो । सर्वोच्च अदालतको वृहत पूर्ण इजलासले वातावरणीय कारण देखाउँदै उक्त फैसला दिएको थियो । तर, फैसलाको पूर्णपाठ भने आइसकेको छैन ।सर्वोच्च अदालतले निजगढमा अन्तर्राष्ट्रिय विमानस्थल निर्माण नगर्न भनेर फैसला गरेकोप्रति मन्त्रीदेखि सांसद र नेताहरूले विकासमा अवरोध पुग्ने भनेर अभिव्यक्ति दिएका छन् । साभार : कान्तिपुर