वीरगन्ज,१३ फागुन :पर्सा क्षेत्र नम्बर १ बाट प्रतिनिधिसभा सदस्य पदका लागि जनमत पार्टीका उम्मेदवार ओमप्रकाश सरार्फले आसन्न निर्वाचनका लागि आफ्नो १२ बुँदे एजेन्डा सार्वजनिक गरेका छन्।बुधबार वीरगन्जमा पत्रकार सम्मेलन गरेर सर्राफले नागरिक जीवनस्तर उकास्न, रोजगारी सिर्जना गर्न, शिक्षा र स्वास्थ्यमा सुधार ल्याउन र वीरगन्जलाई व्यवसायमैत्री तथा समृद्ध महानगर बनाउने लक्ष्यका साथ तयार गरिएको १२ बुँदे चुनावी एजेन्डा सार्वजनिक गरेका हुन् ।
यस्ता छन् सर्राफका १२ बुँदे चुनावी एजेन्डा :
रोजगारी र अर्थतन्त्र
सरार्फका अनुसार, वीरगन्ज देशको प्रमुख व्यापारिक नाका भए पनि युवाहरूको ठूलो संख्या वैदेशिक रोजगारीतर्फ जान बाध्य छन्। नेपालबाट वार्षिक ७–८ लाख युवाहरू विदेशिने तथ्यांकले यो चुनौती स्पष्ट देखाउँछ। उनले स्थानीय उद्योग प्रवद्र्धन, १० हजार युवालाई सीप तालिम, ५ अर्ब रुपैयाँको युवा स्वरोजगार कोष र स्टार्टअप सहयोगमार्फत आगामी ५ वर्षमा कम्तीमा ३० हजार रोजगारी सिर्जना गर्ने योजना छ।
शिक्षा
वीरगन्जका धेरै सामुदायिक विद्यालयमा डिजिटल शिक्षा र गुणस्तरीय पूर्वाधार कमजोर रहेको छ। यसले माध्यमिक तहमा झण्डै ३० प्रतिशत विद्यार्थी पढाइ छोड्ने समस्या सिर्जना गरेको छ। विद्यालयको स्तरोन्नत्ती, स्मार्ट कक्षा विस्तार, शिक्षक तालिम, र आर्थिक रूपमा कमजोर विद्यार्थीका लागि छात्रवृत्ति मार्फत ५ वर्षभित्र विद्यालय छोड्ने दर उल्लेख्य रूपमा घटाइने छ ।
स्वास्थ्य सेवा
नेपालमा नागरिकले स्वास्थ्य खर्चको ५५ प्रतिशत भन्दा बढी आफ्नै जेबबाट तिर्नुपर्दा धेरै परिवार उपचारबाट वञ्चित हुने जोखिममा छन्। वीरगन्जमा नगर स्वास्थ्य बीमा, सस्तो अस्पताल सेवा, ५० भन्दा बढी निःशुल्क स्वास्थ्य शिविर र २४ घण्टा एम्बुलेन्स सेवा सञ्चालन गरी सबै नागरिकलाई आधारभूत स्वास्थ्य सेवामा पहुँच सुनिश्चित गरिनेछ।
पूर्वाधार विकास
वीरगन्ज महानगरका भित्री सडक वर्षायाममा हिलाम्मे र जलमग्न हुने समस्याबाट मुक्त छैनन्। आगामी ५ वर्षमा कम्तीमा ८० किमि सडक स्तरोन्नति, आधुनिक डल तथा वर्षा पानी निकास प्रणाली सुधार, स्मार्ट सडक बत्ती र हरित सार्वजनिक पार्क निर्माण गरिने योजनासहित शहरको पूर्वाधारलाई सबल बनाइनेछ।
भ्रष्टाचार नियन्त्रण नीति
व्यवसायिक सहर भएकाले वीरगन्जमा सेवा लिँदा ढिलासुस्ती र अनौपचारिक खर्चको समस्या देखा परेको छ। यसलाई मध्यनजर गर्दै सबै महानगर सेवा पूर्ण डिजिटल प्रणाली, ई–टेन्डर अनिवार्य, २४ घण्टा गुनासो दर्ता हेल्पलाइन र सार्वजनिक सुनुवाइमार्फत पारदर्शिता सुनिश्चित गरिनेछ।
व्यवसायमैत्री वीरगन्ज
भारतसँगको मुख्य नाका र सुक्खा बन्दरगाह भएको वीरगन्जमा अनुमति प्रक्रिया जटिल रहेको छ। वन स्टप बिजनेस सहायता केन्द्र, डिजिटल दर्ता प्रणाली र स्टार्टअप सहयोगमार्फत आगामी ५ वर्षमा कम्तीमा ५,००० नयाँ व्यवसाय दर्ता गर्ने लक्ष्य राखिएको छ।
महिला सशक्तीकरण र युवा रोजगारी
महिला उद्यम सहभागिता र स्थानीय युवा रोजगारी बढाउन ५,००० महिला तथा युवालाई सीप तालिम, सहुलियत ऋण र उद्योग इन्टर्नशिप प्रदान गरी १०,००० नयाँ रोजगारी सिर्जना गर्ने योजना छ ।
कृषि विकास (परिवेश क्षेत्र लक्षित)
वीरगन्ज आसपासका ग्रामीण वडामा अझै ठूलो जनसंख्या कृषि निर्भर छ। आधुनिक सिचाइ, कोल्ड स्टोर स्थापना, किसान बजार र कृषि सहकारी सशक्तीकरणमार्फत २०% उत्पादन वृद्धि गर्ने योजना रहेको छ।
खेलकुद विकास
शहरमा पर्याप्त स्तरीय खेल मैदान र प्रशिक्षण केन्द्रको अभाव छ। सरार्फले १० नयाँ खेल मैदान, कभर्ड हल स्तरोन्नति र वार्षिक महानगर खेलकुद महोत्सव सञ्चालन गरिनेछ ।
सहज सम्पर्क सचिवालय
नागरिकले सानो सेवाका लागि पनि बारम्बार महानगर धाउनुपर्दा समय र श्रमको अपव्यय हुन्छ। सरार्फको योजना अनुसार एकीकृत सेवा केन्द्र (वन स्टप सेवा), डिजिटल टोकन प्रणाली र ७ दिन हेल्पडेस्क सेवा सञ्चालन गरिनेछ।
संस्कृति र मूल्य संरक्षण
वीरन्ंज बहुसांस्कृतिक सहर भएकाले परम्परा जोगाउनु आवश्यक छ। वार्षिक सांस्कृतिक तथा धार्मिक महोत्सव, स्थानीय कला संरक्षण कोष र विद्यालयमा सांस्कृतिक शिक्षा कार्यक्रम सञ्चालन गरिनेछ।
नागरिक समाज विकास
सामुदायिक सहभागिता बढाउन टोल विकास समिति सशक्तीकरण, सहभागी बजेट प्रणाली र नियमित सार्वजनिक सुनुवाइ कार्यक्रम अनिवार्य गरिनेछ। यसले वीरगन्जलाई पारदर्शी र उत्तरदायी महानगर बनाउने लक्ष्य छ ।